Svandís Svavarsdóttir matvælaráðherra hefur staðfest reglugerð um verndarráðstafanir vegna viðkvæmra hafsvæða og botnvistkerfa.
Í reglugerðinni eru skilgreind þrjú ný svæði þar sem botnveiðar verða óheimilar. Að auki hafa verið færð inn í sömu reglugerð svæði sem áður voru í reglugerð um friðunarsvæði við Ísland. Allar veiðar nema handfæraveiðar og veiðar á uppsjávarfiski með flotvörpu og hringnót verða framvegis óheimilar á þessum svæðum. Við gildistöku þessarar reglugerðar verða allar botnveiðar bannaðar samtals á sautján svæðum í fiskveiðilandhelgi Íslands, en svæðin taka til tæplega 2% af fiskveiðilandhelginni.
Flest svæðanna hafa verið lokuð fyrir veiðum með línu og/eða botnvörpu um langa tíð eða allt frá árinu 1971. Einnig hafa ellefu svæði til verndunar kóralla verið færð inn í reglugerðina en botnveiðar hafa verið óheimilar á hluta þeirra í tæp tuttugu ár.
„Verndun líffræðilegrar fjölbreytni er ein stærsta áskorun samtímans“ sagði matvælaráðherra. „Verndun vistkerfa hafsins er þar mikilvægur þáttur. Markmið alþjóðasamfélagsins eru háleit, stefnt er að verndun um 30% hafsvæða heimsins. Við þurfum að gera betur í þessum málaflokki og þetta er mikilvægt skref í þá átt.“
