Ásthildur Lóa Þórsdóttir, þingkona Flokks fólksins og fyrrverandi mennta- og barnamálaráðherra, segir afsögn sína úr embætti ráðherra hafa verið erfiðustu ákvörðun lífs síns. Eftir afsögnina hafi hún ekki farið úr húsi dögum saman.
Ásthildur Lóa var gestur Páls Magnússonar í Sprengisandi í morgun þar sem hún fór yfir afsögnina og afleiðingar hennar á sig persónulega.
Páll sagði í þættinum að í fyrstu fréttum af máli Ásthildar Lóu hafi verið gefið í skyn þrenns konar brot. Að hún hafi átt barn með ólögráða einstaklingi, að hún hafi verið í valdastöðu gagnvart þessum einstaklingi og að hún hafi svo í kjölfarið tálmað þessum einstaklingi aðgengi að barninu sem þau áttu saman. Þegar leið á fréttaflutning hafi komið í ljós að ekkert af þessu var í rétt og spurði Ásthildi Lóu hvers vegna, í ljósi þess, hún hafi sagt af sér.
„Þetta mál bar rosalega brátt að þennan fimmtudag,“ segir Ásthildur Lóa og að það hafi verið augljóst að RÚV hafi talið sig vera með „einhverja sprengju“ í höndunum. Hún hafi ekki vitað hvað þau myndu segja en það hafi verið læti í kringum þetta og henni sagt að fréttastofan myndi flytja fréttina sama hvort hún myndi mæta í viðtal um málið eða ekki.
Hér er hægt að hlusta á viðtal við Ásthildi Lóu sem var gestur Páls Magnússonar í Sprengisandi
