Þórunn Reynisdóttir, forstjóri Úrvals Útsýnar var í útvarpsviðtali hjá rúv í morgun og fór ófögrum orðum um stjórnendur flugfélagsins Play
Þórunn átti fund með Einari Erni Ólafssyni, forstjóra Play, í ágúst, ásamt fleirum úr ferðaþjónustunni. Þar hafi hann verið spurður út í flutning starfseminnar til Möltu og hvort hann væri að fara að setja íslensku kennitöluna á hausinn. „Hann hélt nú ekki,“ segir Þórunn.
Hún setur spurningamerki við rekstur Play og segir stjórnendur þess, sem sumir hverjir koma frá WOW, ekki hafa lært af reynslunni. Þórunn tók ákvörðun fyrir nokkrum mánuðum að draga úr viðskiptum við Play vegna óvissu um rekstur félagsins.
Þá sagði hún jafnframt að mikilmennskubrjálæði hefði einkennt rekstur og stjórnun
„Já, ég er forstjóri flugfélagsins, eins og það sé eitthvað merkilegt. Það er bara eins og að vera forstjóri Strætó,“ segir Þórunn. Rætt var við hana á Morgunvaktinni á Rás 1.
Þórunn hefur áratugareynslu úr ferðaþjónustunni og segist þekkja það vel að hlutirnir geti breyst hratt en hún er mjög gagnrýnin á eftirlitsaðila með flugfélögum. Fall Play kom Eyjólfi Ármannssyni innviðaráðherra í opna skjöldu. Niðurstaða fjárhagseftirlits Samgöngustofu í ágúst var að félagið væri rekstrarhæft og því þótti ekki tilefni til að grípa til aðgerða á þeim tímapunkti.
Laskað orðspor Íslands
Þórunn segir orðspor Íslands skaðast vegna falls Play.
„Við tölum um að við séum eitt besta og flottasta ferðaland í heimi, þá verðum við að starfa samkvæmt því og upplýsingagjöfin þarf að standast. Þeir sem eru að gefa upplýsingarnar, eins og í tilfelli Play, það var búið að gefa út að það myndi lifa 100% fram yfir áramót. Það er gefið út af KPMG, Samgöngustofu, ráðuneytinu og að sjálfsögðu fjárfestum.“
Rætt var við Þórunni í Morgunvaktinni á Rás 1 í morgun
