Eyjólfur Ármannsson innviðaráðherra hefur undirritað reglugerð um ráðstöfun afla sem dreginn er frá heildarafla samkvæmt 5. mgr. 8. gr. laga nr. 116/2006, um stjórn fiskveiða. Reglugerðin hefur tekið gildi.
Í reglugerðinni er tilgreint hvernig ráðstafa skuli afla sem dreginn er frá heildarafla, nánar tiltekið þeim afla sem tilheyrir almennum byggðakvóta, línuívilnun, skel- og rækjubótum og frístundaveiðum.
Leyfilegur heildarafli dróst saman milli ára samanber rg. 860/2025 sem þýðir að afli sem er til ráðstöfunar í byggðakerfi í sjávarútvegi (5,3% kerfið) dregst einnig saman. Að auki eru gerðar breytingar á ráðstöfun og vegna þeirra er gripið til sérstakra mótvægisaðgerða.
Til að milda áhrif af samdrætti verður aukið í úthlutun í sértæka byggðakvótann, sem Byggðastofnun ráðstafar til viðkvæmustu sjávarbyggðanna. Samhliða verður í almennum byggðakvóta aukið við ráðstöfun í öðrum tegundum en þorski.
Annmarkar kalla á breytingar
„Reglugerðin markar upphaf að stefnubreytingu stjórnvalda þar sem dregið er úr vægi úthlutunarflokka sem sætt hafa gagnrýni vegna annmarka. Ríkisendurskoðun hefur bent á að almenni byggðakvótinn sé staðnaður, skorti mælikvarða á árangur og að úthlutun sé oft ómarkviss, auk þess sem starfshópar verkefnisins Auðlindin okkar komst að þeirri niðurstöðu að línuívilnun og skel- og rækjubætur þjóni ekki lengur upphaflegum markmiðum.
Næsta verkefni verður heildarlöggjöf um byggðakerfið þar sem pottarnir verða endurskipulagðir frá grunni. Við erum vel á veg komin með nýtt strandveiðikerfi sem hefur það markmið að ýta undir jákvæð byggðaáhrif. Markmiðið er að úthlutun í byggðakerfinu verði gagnsærri og skili sér með óumdeildum og jákvæðum hætti til þeirra byggða sem á þurfa að halda,“ segir Eyjólfur Ármannsson innviðaráðherra.
