Kona á fertugsaldri var dæmd í 6 mánaða fangelsi í Héraðsdómi Reykjavíkur, bundið skilorði til tveggja ára, fyrir sérstaklega hættulega líkamsárás með því að hafa veist af barnsföður sínum fyrir utan Ölhúsið í Hafnarfirði í nóvember árið 2022 og slegið hann eða kastað af stuttu færi í hann bjórglasi sem brotnaði svo hann fékk sex skurði í andlit og á höfuð sem sauma þurfti sem og mar á höfði og höfuðverk. Konan hafði áður fengið 90 daga fangelsisdóm.
Morgunblaðið fjallar ítarlega um ofbeldisverknaðinn og þar segir að dómurinn telji árásina hafa verið tilefnislausa, beinst að höfði mannsins þannig að farið hefði getað verr. Enn fremur leit dómurinn til þess að konan hefur ekki áður verið sakfelld fyrir ofbeldisbrot og hún hefur játað frá upphafi.
Sérstaklega hættuleg líkamsárás
Þá kemur fram að konan var í héraðsdómi, dæmd til að greiða barnsföðurnum 700 þúsund krónur í skaðabætur auk vaxta sem og málsvarnarlaun skipaðs verjanda síns upp á rúmar 1,2 milljónir auk annars sakarkostnaðar.
,,Telur dómurinn að um sérstaklega hættulega líkamsárás hafi verið að ræða og féllst hann ekki á að árásin hafi verið framin í neyðarvörn þar sem ekki þótti sannað að barnsfaðir konunnar eða það fólk sem með honum var þegar árásin átti sér stað hafi ógnað konunni í aðdraganda hennar.
Konan á samkvæmt dóminum nokkurn sakaferil að baki sem einkum varðar umferðarlagabrot. Síðast var hún dæmd í apríl í fyrra til að sæta 90 daga fangelsi fyrir akstur svipt ökurétti og var sá dómur hegningarauki við dóm Landsréttar frá janúar 2024. Þannig þótti dóminum refsing hennar hæfilega ákveðin fangelsi í sex mánuði.“ Segir í frétt Mbl.is
