Auglýst er eftir nýjum ríkislögreglustjóra í Lögbirtingablaðinu og er umsóknarfrestur til 18. desember. Sigríður Björk Guðjónsdóttir fyrrverandi ríkislögreglustjóri sagði af sér embætti í síðasta mánuði og hefur Úlfar Lúðvíksson fyrrverandi lögreglustjóri á Suðurnesjum þegar lýst yfir áhuga á starfinu.
Auglýsing um starfið er svohljóðandi:
Embætti ríkislögreglustjóra laust til umsóknar
Auglýst er laust til umsóknar embætti ríkislögreglustjóra. Leitað er að öflugum leiðtoga með skýra sýn og getu til þess að leiða fólk til árangurs, í þeim tilgangi að móta og efla starfsemi embættisins.
Hæfniskröfur.
- Öflug leiðtogahæfni og farsæl reynsla af stjórnun og stefnumótun er skilyrði.
Rík samskipta- og samstarfshæfni er skilyrði.
Þekking og yfirsýn yfir verkefni lögreglunnar og skýr framtíðarsýn varðandi embætti ríkislögreglustjóra og þróun löggæslu er skilyrði.
Þekking og reynsla á sviði reksturs og áætlanagerðar er skilyrði.
Þekking og reynsla af umbótastarfi er kostur.
Reynsla af alþjóðasamstarfi er kostur.
Fagmennska, frumkvæði, drifkraftur og lausnamiðuð hugsun.
Mjög gott vald á íslensku og ensku og færni til að tjá sig í ræðu og riti.
Dómsmálaráðherra skipar í embætti ríkislögreglustjóra til fimm ára í senn sbr. lög um réttindi og skyldur starfsmanna ríkisins, nr. 70/1996. Dómsmálaráðuneytið hefur ákveðið að fela nefnd að fara yfir þær umsóknir sem berast og á nefndin að skila ráðherra rökstuddu áliti á hæfni umsækjenda. Öllum umsóknum verður svarað þegar ákvörðun um skipun liggur fyrir. Um laun og starfskjör ríkislögreglustjóra fer samkvæmt 39. gr., sbr. 39. gr. a., laga nr. 70/1996, um réttindi og skyldur starfsmanna ríkisins.
Hlutverk og ábyrgð.
Umsókn skal vera skrifleg og skal fylgja ítarleg ferilskrá ásamt kynningarbréfi þar sem gerð er grein fyrir færni viðkomandi til að gegna embættinu í samræmi við þær hæfniskröfur sem fram koma í 28. gr. laga nr. 90/1996 og auglýsingunni. Í umsókninni skulu einnig koma fram upplýsingar um hvern og einn þeirra þátta sem tilgreindir eru í 28. gr. lögreglulaga og auglýsingunni auk annarra upplýsinga sem varpað geti ljósi á faglega eiginleika og færni umsækjanda sem máli skipta fyrir störf ríkislögreglustjóra. Með umsókn skulu fylgja afrit af prófskírteinum.
Ríkislögreglustjóri fer með málefni lögreglu í umboði dómsmálaráðherra. Ríkislögreglustjóri er forstöðumaður embættisins og ber faglega og fjárhagslega ábyrgð á starfi þess. Hlutverki ríkislögreglustjóra er nánar lýst í 5. gr. lögreglulaga nr. 90/1996 og reglugerð um starfsemi, hlutverk og ábyrgð embættis ríkislögreglustjóra nr. 325/2021. Eitt af hlutverkum ríkislögreglustjóra er að starfrækja lögregluráð sem er formlegur samráðsvettvangur lögreglustjóra og er ríkislögreglustjóri formaður ráðsins. Umsækjendur skulu fullnægja skilyrðum 2. mgr. 28. gr. lögreglulaga nr. 90/1996.
Umsóknarfrestur er til og með 18. desember og skal umsóknum skilað inn í gegnum Starfatorg. Nöfn allra umsækjenda verða birt á vef ráðuneytisins að liðnum umsóknarfresti. Upplýsingar um starfið veitir Bryndís Helgadóttir, settur ráðuneytisstjóri (bryndis.helgadottir@dmr.is) og Unnur Helgadóttir, mannauðsstjóri (unnur.helgadottir@dmr.is). – Dómsmálaráðuneytið.
