Mikil rigning setti svip sinn á dagskrá Þjóðhátíðar í gærkvöldi og nótt. Færra fólk var í brekkunni en á föstudagskvöldinu, en flestir voru þó vel búnir að sögn lögreglunnar í Vestmannaeyjum.
Lögregla hafði í nógu að snúast og voru flest verkefni tengd ölvun. Fangageymslur voru fullar á tímabili, en gestum lögreglu fer fækkandi með morgninum. 14 fíkniefnamál komu upp og í einu máli var aðili grunaður um sölu, en í fórum hans fundust yfir 40 grömm af kókaíni, sem voru haldlögð.
Eitt kynferðismál hefur verið tilkynnt lögreglu og rannsókn þess komin vel á veg. Tvær minniháttar líkamsárásir voru tilkynntar og einn aðili stöðvaður grunaður um akstur undir áhrifum vímuefna.
Undir morgun hefur stytt upp og nú er þurrt í Eyjum en skýjað.
Umræða
