Almenn reiði ríkir meðal grásleppusjómanna vegna ákvörðunar sjávarútvegsráðherra að stöðva veiðar og fella öll leyfi til grásleppuveiða úr gildi. Þetta segir Hjálmar Höskuldur Hjálmarsson, grásleppusjómaður á Hofsósi, sem íhugar málaferli gegn ráðherra. Þetta kemur fram á vef ríkisútvarpsins sem ræddi við Hjálmar og fleiri sjómenn.
Ástæða þess að veiðarnar eru stöðvaðar er gríðarmikil veiði það sem af er vertíðinni. Rúm 4000 tonn eru komin á land en heildarráðgjöf Hafrannsóknastofnunar var 4.646 tonn. Því stefndi í að allur kvótinn kláraðist áður en veiðar gætu hafist á öllu landinu.
„Ég var að fara að hefja mína tuttugustu vertíð. Þetta er svo ótrúlega gerræðislegt. Ég hefði aldrei trúað þessu. Það er gríðarlegur fjöldi búinn að hafa samband og það er almenn reiði. Það er verið að svipta menn atvinnurétti sem þeir hafa keypt sig inn í. Lögmenn sem ég hef rætt við telja þetta varða við stjórnarskrá,“ segir Hjálmar Höskuldur í samtali við fréttastofu, en Fiskifréttir greindu frá því í dag að hann íhugi málsókn á hendur ráðherra.
„Menn eru búnir að skuldsetja sig, ráða mannskap og allavega. Ég á erfitt með að trúa að þetta sé löglegt, að beita þessari aðferð,“ segir Hjálmar um skyndiákvörðun ráðherra.
Íhuga málaferli gegn ráðherra: „Reiðin er óskapleg“
https://gamli.frettatiminn.is/dekrad-vid-stora-kvotathega-og-nidst-a-smabatasjomonnum/
