Það helsta frá dagbók lögreglu er að þegar þetta er ritað eru átta manns vistaðir í fangaklefum lögreglu. Alls eru 81 mál bókuð frá tímabilinu kl. 17:00-05:00.
Nokkur minniháttar umferðaslys tilkynnt ásamt töluvert af heimilisofbeldis- og ágreiningsmálum. Sjö ökumenn stöðvaðir í umferðinni sem reyndust ölvaðir víðsvegar um umdæmið. Borgararnir aðstoðaðir á margvíslegan hátt og listinn hér að neðan alls ekki tæmandi.
Lögreglustöð 1
Aðila vísað út af neyðarskýli Reykjavíkurborgar sökum æsings. Tveimur klukkustundum seinna var sami aðili tilkynntur að hafa ráðist á annan skjólstæðing gistiskýlisins með flösku eftir að sá síðarnefndi sló hann. Þeir báðir mjög ölvaðir og ekki í ástandi til að vera meðal almennings. Vistaðir í klefa.
Ágreiningur milli mæðra tilkynntur í Reykjavík. Á vettvangi reyndi lögregla að stilla til friðar sem virtist vera að takast þegar móðirin, sem var töluvert ölvuð, kastaði litlum hundi sem hún var með í fanginu í bringu lögreglumanns. Hundurinn var ómeiddur eftir kastið. Móðirin var að lokum handtekin og vistuð í klefa vegna nokkurra brota.
Ökumaður var stöðvaður í umferðinni. Fljótlega vaknaði grunur að hann væri undir áhrifum fíkniefna og var hann því handtekinn. Á honum fannst síðan töluvert magn taflna, smelluláspoka og peninga þar sem grunur vaknaði um sölu fíkniefna. Aðspurður vildi ökumaðurinn ekki heimila lögreglu að skoða farsíma hans. Vistaður í klefa í þágu rannsóknar málsins.
Tilkynnt um tvo eldri menn sem voru til ama í miðborginni. Þeir neituðu báðir að gefa upp nafn og kennitölu og voru því handteknir. Þeir létu þó loks undan á lögreglustöðinni og gáfu það upp. Þeir lausir að því loknu.
Lögreglustöð 2
Tilkynnt um barn sem hafði orðið læst inni í herbergi í íþróttahúsi. Áður en lögregla kom hafi starfsmenn og foreldrar þó náð barninu út á heilu og höldnu.
Tilkynnt um líkamsárás á dyravörð á bar í Hafnarfirði. Sá var mjög ölvaður, óðamála, talaði samhengislaust og andlega veikur en lögreglumenn þekkja hann vegna fyrri afskipta. Hann vistaður í klefa.
Lögreglustöð 3
Tilkynnt um megna klórlykt á stigagangi fjölbýlis þar sem menn voru að hlaupa út úr íbúð í húsinu. Mikil ammoníaklykt var á vettvangi þegar lögregla kom og var slökkvilið fengið til þess að reykræsta íbúðina. Húsráðandi sagðist hafa verið að spreyja skordýraeitri inni í íbúðinni til þess að drepa flugur en hann var síðan fluttur til frekari aðhlynningar af sjúkraflutningsmönnum. Við skoðun í íbúðinni fannst vopn og nokkuð magn fíkniefna.
