Ég tók þátt í gæðakönnun um þjónustu Samgöngustofu á dögunum. Líklega hef ég verið í því úrtaki vegna þess að ég á mikil samskipti við stofnunina allt árið um kring og undanfarna áratugi.
Skemmst er frá því að segja að árið 2023 fékk stofnunin falleinkunn í minni umsögn, bæði hvað varðar bifreiðaviðskipti og skipaeftirlit. Ég hlakkaði mikið til að sjá breytingar til batnaðar í kjölfar könnunarinnar.
Afturför og léleg og engin þjónusta
En nei, þjónustan snarversnar og gerir viðskiptavinum enn erfiðara fyrir með að allt gangi smurt við t.d. eigendaskipti á bifreiðum. Ef fólk ætlar t.d. að hafa eigendaskipti á eyðublaði Samgöngustofu, þá er það rekið út, ef um vangreidd bifreiðagjöld er um að ræða eða vanrækslugjald vegna endurskoðunar á bifreið. Fólk þarf þá að leita að einhverri skoðanastöð og gera sér ferð þangað akandi til að greiða það sérstaklega þar og aka svo til baka í Samgöngustofu til þess að klára eigendaskiptin. Þetta er í besta falli algert rugl. Bifreiðaskoðanir kæra sig að auki ekkert um að annast innheimtu fyrir ríkið.
Er þetta stefna stjórnvalda í umhverfismálum og kolefnisjöfnun? Að þeyta fólki á faratækjum á milli borgarhluta? Þá er rétt að geta þess að hægt var að greiða uppreiknað bifreiðagjald og eigendaskipti á netinu eða í farsíma á síðasta ári. Nú er stofnunin búin að loka alveg sérstaklega fyrir það. Staðan er því þannig að seljandi þarf að greiða bifreiðagjald sem kaupanda ber að greiða, fyrir árið 2024. Síðar má hann eiga von á endurgreiðslu. Þetta er mikil afturför en algerlega í takt við flest vinnubrögð hjá Samgöngustofu sem lokar á kerfi sem virkaði og tekur upp ný og afleit vinnubrögð sem eru út úr kortinu.
