Páll Pálsson ÍS: skipstjórinn í brennidepli

Einar Valur Kristjánsson, framkvæmdastjóri Hraðfrystihússins Gunnvör hf hefur ekki svarað ítrekuðum fyrirspurnum blaðsins um uppsaögn áhafnar Páls Pálssonar ÍS í fyrra og ráðningu á nýja skipið.
Hann var inntur eftir því hvers vegna nauðsynlegt var talið að segja áhöfninni upp og hvers vegna nokkrir úr áhöfninni fengu ekki endurráðningu.

Páll Halldórsson, skipstjóri segir að eðlilegt hafi verið að segja áhöfinni upp þar sem svo langur tími leið frá því að gamla skipið var selt og það nýja kom eða nærri eitt ár. Þá hafi þeir úr gömlu áhöfninni átt kost á endurráðningu sem ekki hafi sjálfir verið búnir að ráða sig í önnur störf þegar að endurráðningu kom. Hann vildi ekki svara því hver hafi tekið ákvörðun um uppsögn og mannabreytingar, er hann var spurður að því hvort skipstjórinn hefði ákveðið þetta eða útgerðin. Sagði það eitt að þetta væri búið og gert.
Leitað var til félag skipstjórnarmanna og varð Árni Bjarnason, formaður fyrir svörum. Hann sagði að það væru engin ákvæði í kjarasamningum um þetta að útgerðinni væri algerlega í sjálfsvald sett hvort áhöfn væri sagt um við skipaskipti og eins réði útgerð algerlega ráðningu á nýtt skip. Sagði Árni að tilvikin í því sambandi væru jafn misjöfn og þau væru mörg.
Heimir Tryggvason, fyrrverandi yfirstýrimaður og afleysingaskipstjóri staðfestir að Páll Halldórsson hafi í júní í fyrra sagt sér að hann yrði áfram á skipinu en hefði svo haft samband við sig í júlí þegar uppsagnarfrestur var liðinn og tilkynnt honum að hann fengi ekki pláss á nýja skipinu. Hilmar Lyngó vélstjóri segir svipaða sögu. Framkvæmdastjóri fyrirtækisins hafi ítrekað sagt honum að hann yrði áfram en svo hafi í mars 2017 það gerst, er Hilmar var nýkominn frá Kína að útgerðarstjórinn sagði honum að búið væri að ráða í stöðuna hans og honum boðin önnur lægri.
Heimildarmönnum blaðsins ber saman um að ýmist skipstjóri eða yfirmenn útgerðarinnar hafi sagt eitt eða gefið ákveðið í skyn um endurráðningu og svo hafi annað komið á daginn. Í sumum tilvikum virðist það hafa leitt til trúnaðarbrests. Þá hafa ástæður fyrir því að mönnum var ekki boðið starf að nýju eða boðið lakara starf ekki legið á lausu.  Einn heimildarmaður sagði að svörin hefðu verið að búið væri að taka ákvörðun, henni yrði ekki breytt og ástæður yrðu ekki ræddar. Aðrir tóku í sama streng. Rætt hefur verið við stóran hóp til þess að fá sem skýrasta mynd af þessu tiltekna máli, mannaráðningu á Pál Pálsson ÍS og framkomu fyrirtækisins við starfsmenn þess á síðustu árum.
Þá er ekki fyllilega ljóst hverjir tóku ákvarðanir um mannabreytingar hverju sinni.Víst er þó að framkvæmdastjóri fyrirtækisins og útgerðarstjóri komu að ráðningu vélstjóra auk skipstjórans, en meira er á huldu um þátt annarra en skipstjóra í ráðningu annarra yfirmanna. Eru vísbendingarnar sem unnt er að finna í þeim málum á þann veg að böndin berast helst að skipstjóranum um ábyrgð á umdeildustu mannaráðningunum. Eitt stendur þó upp úr, þetta mál hefur mælst illa fyrir í samfélaginu og spillt orðspori fyrirtækisins. Bæjarbúum er greinilega ekki sama um það hvernig komið er fram við starfsmenn eftir hátt í þrjátíu ára feril hjá þessu stóra og mikilvæga fyrirtæki á Ísafirði.
blaðið Vestfirðir/k