Félag tónskálda og textahöfunda og söngvarar vilja ekki að Ísland taki þátt í Eurovision 

Bragi Valdimar Skúlason, formaður félagsins leggur til að meira verði gert úr íslensku Söngvakeppninni í staðinn. Stjórn RÚV tekur ákvörðun á miðvikudaginn um hvort Ísland taki þátt eða ekki. Miðað við þá miklu andstöðu þeirra er málið varðar, verða að teljast meiri líkur en minni á að Ísland taki líklega ekki þátt í Eurovision í ár.

Þá segir Páll Óskar Hjálmtýsson í yfirlýsingu sinni: Lagahöfundar og flytjendur, takið eftir: Eurovision verður ekki gott gigg í Vín og erfið upplifun fyrir alla, bæði keppendur og áhorfendur.

Ég mæli ekki með þessu ferðalagi til Austurríkis. Þið getið keppt með lagasmíðar ykkar undir öðrum og betri kringumstæðum. Lóa Hjálmtýsdóttir frænka mín, kom með frábæra lausn á þessu.

Ágóðinn látinn renna til barna sem enn lifa á Gaza

Það er vel hægt að halda glæsilega keppni hér heima og bjóða sniðgönguþjóðunum að vera með, Írlandi, Spáni, Slóveníu, Hollandi og fleirum sem gætu bæst við á næstu dögum. Þetta gæti orðið stærsti sjónvarpsviðburður í sögu RÚV, fólk víða um Evrópu myndi langa að fylgjast með, það er gott fyrir listamennina sem taka þátt þar sem streymi á lögunum þeirra tekur kipp og keppnin yrði sömuleiðis mikil mjólkurkú fyrir RÚV.

Engan hvítþvott fyrir stríðsglæpamenn!

Ágóðinn yrði látinn renna til barna sem enn lifa á Gaza. Þá getur þú svo sannarlega flutt gleðipopp með góðri samvisku, með fókus á flutninginn, en ekki spennuna baksviðs og ógeðslegu kommentin á netinu. Hver getur sungið gleðipopp með óbragð í munninum? Kepptu með góðri samvisku með því að hjálpa fólki um leið. Þessi hugmynd hjá Lóu er mannlega, mannbætandi leiðin. Spýtum í lófana og framkvæmum þetta.

Frjáls Palestína. Ísrael úr Eurovision. Engan hvítþvott fyrir stríðsglæpamenn!