,,Lýsum hér með yfir vantrausti á sjávarútvegsráðherra“
Stjórn Sæljóns félags smábátaeigenda á Akranesi mótmælir harðlega þeim breytingum sem fram koma í drögum að reglugerð um hrognkelsaveiðar á árinu 2020 sem birt eru á samráðsgátt stjórnvalda. Breytingar sem koma fram í þessum drögum eru svo íþyngjandi að þær geta leitt til þess að grásleppuveiðar í Faxaflóa og viðar leggjast af.
Þá hefur Strandveiðifélagið Krókur, félag smábátaeigenda í Barðastrandarsýslu krafist þess að Kristján Þór Júlíusson sjávarútvegsráðherra segir sig frá málefnum smábáta. Þetta kemur fram í umsögn félagsins um reglugerðardrög um grásleppuveiðar sem eru til umsagnar í samráðsgátt stjórnvalda sem m.a. LS og BB.is hafa fjallað um:
,,Hefndaraðgerð
Í umsögninni segir að ekki sé hægt „að eiga málefnanlegar umræður um þá íþyngjandi reglugerð sem sjávarútvegs- og landbúnaðarráðherra, Kristján Þór Júlíusson hefur nú lagt fram, þar sem hún er lögð fram sem hefniútspil ráðherra til að knýja fram stuðning við kvótasetningarfrumvarp hans.“
Þá segir að ráðherra kalli eftir auknu eftirliti vegna meðaflamælinga, en þær séu eins óvísindalegar og hugsast getur þar sem meðafli fyrstu róðra var uppreiknaður á alla vertíðina, og bent hefur verið á þessa fráleitu mæliaðferð af forsvarsmönnum LS.
Þá kemur fram í umsögninni að ráðherra hafi hafnað öllum hugmyndum um breytingar á núverandi kerfi sem eru til þess að mæta kröfum um minni meðafla á grásleppuveiðum með þeim rökum að þær myndu kalla á of mikið eftirlit „en þegar ráðherra leggst svo lágt að framkvæma áður gefnar hótanir um íþyngjandi reglugerð á grásleppuveiðar vegna þess að hann hafi verið gerður afturreka með kvótasetningu, þá er hægur leikur að gera töluvert af breytingum og alveg nóg til af mannskap í eftirlit“ segir í umsögn strandveiðifélagsins Króks.
Kvótasetningu hafnað
loks segir:
„LS hefur alltaf ályktað gegn kvótasetningu á grásleppu og gerir enn (meirihluti grásleppuleyfishafa og félagsmanna almennt), og njótum við stuðnings um það innan þingsins. Ráðherra er nú að framfylgja hótunum frá fundum með forsvarsmönnun LS um íþyngjandi reglugerð þar sem kvótasetningarfrumvarp sé fast innan þingflokka Framsóknar og VG, og fyrirséð að menn myndu hér frekar kalla eftir kvótasetningu en að fá yfir sig þessa reglugerð sem ráðherra getur sett á án aðkomu þingsins.“
Sett er fram þessi krafa í niðurlagi umsagnarinnar: Strandveiðifélagið Krókur fer fram á að Kristján Þór Júlíusson segi sig frá málefnum smábátasjómanna og að umrædd reglugerð verði dregin til baka.“
Undirtóninn í þessum aðgerðum/drögum eru:
-
- Gríðarlegt og hert eftirlit.
-
- Takmarka sóknargetu. Hámarkslengd neta á hvern bát verði stytt um helming verði 3.750 m í stað 7.500 m. Ef þessar tillögur njóta brautargengis verður afkoma grásleppubáta svo léleg að fækka þarf í áhöfnum grásleppubáta, þannig að þeir verða í flestum tilfellum einungis einn maður.
-
- Neyða grásleppusjómenn til að kaupa þorskveiðiheimildir, – verð á tonni er um 2.5 milljónir fyrir varanlegar heimildir.
-
- Fiskistofu verði heimilt að svipta bát veiðileyfi ef um óeðlilega veiði á botnfisktegundum að ræða þannig að magn botnfiskstegunda í þorskígildum talið sé ítrekað svipað eða meira en magn grásleppuaflans í þorskígildum talið.
Lýsum hér með yfir vantrausti á sjávarútvegsráðherra
Þetta eru ekkert annað en bein aðför að smábátasjómennsku á Íslandi. Sú síðasta í langri röð aðgerða og tillagna frá sjávar-útvegsráðherra og opinberra aðila til þess að veikja smábátaútgerð á Íslandi.
Við lítum á þetta útspil sem hefndaraðgerð að hálfu Kristjáns Þórs Júlíussonar vegna andstöðu okkar við kvótasetningu á grásleppu. Við höfum lagt tillögur til lausnar á vandamálum varðandi meðafla við grásleppuveiðar, – að gefa mönnum kost á að gera hlé á veiðum án dagaskerðingar ef um óeðlilegan meðafla er að ræða.
Ráðherra hefur ítrekað hafnað þeim tillögum.
Við í stjórn Sæljóns félags smábátaeigenda á Akranesi lýsum hér með yfir vantrausti á sjávarútvegsráðherra Íslands Kristján Þór Júlíusson og skorum á LS að gera slíkt hið sama.
