Þegar Sovétríkin liðu undir lok héldu menn að kommúnisminn væri endanlega horfinn á öskuhauga sögunnar rétt eins og nasisminn og fasisminn. En lengi lifir í gömlum glæðum. Vladimir Pútín Rússlandsforseti er mótaður í Sovésku ofbeldismaskínunni er hét KGB og hefur gengið undir ýmsum nöfnum svo sem NKVD, GPU, OGPU, NKGP, MGB. Þessar lögreglu- og njósnasveitir voru gjarnan kallaðar Öryggisveitir alþýðunnar.
Vladimir Putin hefur beitt slíkum sveitum víða um heim svo sem í Sýrlandi, Venezuela, Kúbu, Tétsníu, Úkraínu og víða í Afríku. Heimafyrir eru tugþúsundir meðlima FSB í dag að passa alþýðuna. Þess vegna getur Drífa forseti ASÍ andað léttar: „kommúnistagenið“ er enn á lífi og dafnar í það minnasta undir stjórn Putins.
Það hefur gjarnan tíðkast meðal þeirra sem eru með þetta gen að efna til mótmælafunda við Austurvöll þegar þeir telja að þurfi að efla genamengið. Nú er tilefnið sala á hlut í Íslandsbanka sem var framkvæmd heldur klaufalega en án athugasemda allra flokka á Alþingi – þar til hún hafði átt sér stað. Á seinasta mótmælafundi áréttaði ASÍ forsetinn að rétt væri að koma stærsta stjórnmálaflokki landsins frá og hvíla þannig alþýðuna.
Þannig er eðli „kommúnistagensins“ að horfa fram hjá frjálsum lýðræðislegum kosningum og krefjast þess að hinn og þessi lýðræðislega kjörinn flokkur verði settur út í kuldann. „Kommúnistagenið“ í Rússlandi leysir þessi mál með öðru móti en ASÍ formaðurinn leggur til. Þar gengur FSB í málið og eitrar fyrir mönnum eða læsir þá í minnst 15 ára fangelsi. Drífa hefur reyndar sér til málsbóta er hún snérist gegn „hreinsunum“ í Eflingu.
En víðar leynist „kommúnistagenið“. Útsendar RÚV mæta ætíð hlýðnir á vettvang þegar mótmælafundir genamengisins eru haldnir á Austurvelli við fætur frelsishetjunnar Jóns Sigurðssonar. Þar lepja þeir upp af mikilli áfergju ávirðingar sem ræðumenn bera á einn af lýðræðislega kjörnum flokkum í landinu. „Kommúnistagenið“ lætur ekki að sér hæða.
