Endurgreiðslur eru nú hafnar á launum um 260 opinberra starfsmanna, embættismanna og kjörinna fulltrúa sem talin voru ofgreidd. Málið má rekja til þess að árið 2022 tilkynnti Fjársýsla ríkisins að um 260 starfsmenn hjá ríkinu ásamt embættismönnum og kjörnum fulltrúum hefðu fengið ofgreidd laun og það þyrfti að leiðrétta. Fjalla’ð er ítarlega um málið á vef ríkisútvarpsins.
Þetta átti meðal annars við um héraðsdómara landsins sem ákváðu að taka málinu ekki þegjandi og stefndu ríkinu vegna kröfu um endurgreiðslu á launum þeirra. Hæstiréttur staðfesti í desember á síðasta ári að íslenska ríkið mætti ekki lækka laun dómaranna og krefja þá um endurgreiðslu og átti það einnig við um alla hina 260 starfsmennina sem hlutu ofgreidd laun að mati Fjársýslunnar.
Björn Leví Gunnarsson, þingmaður Pírata birti í gær færslu á Facebook-síðu sinni þar sem hann tók fram að sér hefðu borist greiðslur frá Ríkissjóði Íslands. Hann hafi þó ekki fengið neinn launaseðil sem útskýrði greiðslurnar og hann botni lítið í þeim upphæðum sem hann fékk.
Í færslunni má sjá þrjár færslur sem samtals eru upp á um 1,3 milljónir króna. „Ég er ekki með neinn launaseðil um þetta. Ég veit ekkert hvernig þessi útreikningur virkar sem er á bak við þetta og hef satt best að segja ekki hugmynd um hvort þetta sé rétt eða ekki,“ segir Björn Leví í færslu sinni sem ríkisútvarpið vitnar í.
