Góð veiði hefur verið hjá strandveiðibátum í kvótakerfi um allt land þá örfáu daga sem þeir hafa komist á sjó í mars en erfitt er að stunda handfæraveiðar nema við góð veðurskilyrði
Fréttatíminn ræddi við sjómenn víðsvegar um land og ágætt hljóð var í flestum. Helsta áhyggjuefnið er að ríkisstjórnin hefur ekki enn gefið út lög eða reglugerð um 48 daga til strandveiða þar sem afli má vera tæp 800 kg. á dag. Mikið er kvartað yfir ófyrirsjánleika í greininni og að festa þurfi úthlutanir í sessi svo eigendur báta geti gert sínar áætlanir sem byggðar eru á öruggum forsendum. Það er mokveiði á grunnslóð en strandveiðibátar mega ekki byrja að veiða fyrr en fyrsta maí.
Þorskur og mokveiði um allan sjó – Eini fiskurinn sem ekki finnst er í excel skjölum Hafró og Fiskistofu
,,Það er allt fullt af þorski og mokveiði um allan sjó en eini fiskurinn sem ekki finnst er í excel skjölum Hafró og Fiskistofu og svo hjá pólitíkusum.
Við getum ekki sett krókana í sjó án þess að vera með fisk á hverjum króki, það er bókstalega allt vaðandi í þorski stutt frá landi, á miðum stranveiðimanna.
Auðvitað ætti að lengja strandveiðitímabilið frá 1. mars til 1. oktober ár hvert. Það er hægt að gera það með einu pennastriki. Það væri rétt fiskveiðistjórnun, ekki sú staðnaða og ónýta til 40 ára sem var gerð til þess að vernda stórútgerðina en ekki fiskinn í sjónum“ sagði vistvænn smábátasjómaður.
Úrelta gamla kvótakerfið sett á til höfuðs strandveiðimönnum
,,Úrelta gamla kvótakerfið var sett á til höfuðs stranveiðimönnum, til þess að koma öllum aflaheimildum í þjóðareigu, umhverfis landið okkar, í hendur örfárra stórútgerða, þetta vita allir sem eitthvað vita um þessi mál. Svo er okkur gert eins erfitt fyrir og hægt er, þetta kallast kúgun á mannamáli. Við verðum að drífa okkur út á sjó og megum bara vera ákveðið margar klukkustundir úti á sjó, við vinnum sem sagt eftir skeiðklukku.
Þá má aðeins eigandi smábáts róa bátnum og aðeins hafa 16 króka á handfærum. Svona bull er ekki til í lögum um veiðar stórútgerðarinnar og enginn orðið var við að forstjóri Samherja, Brims eða þessara stærstuútgerða hafi sést í sjógalla þar um borð.
Það sjá allir sem vilja, að þetta er algjörlega galið og minnir helst á lög um vistaánauð vinnufólks í bændasamfélaginu á sautjándu öld. Við erum enn föst þar í boði stjórnvalda undanfarinna áratuga.“ Sagði vistvænn smábátasjómaður.
Aflafréttir birtir reglulega lista yfir veiðar báta og hægt er að skoða hann á vef fréttamiðilsins
