Kolbrún Áslaugar Baldursdóttir og Sigurjón Þórðarson þingmenn Flokks fólksins lögðu áherslu á jöfnuð og réttlæti í ræðum sínum í eldhúsdagsumræðum á Alþingi.
Þau gegna formennsku í mikilvægum fastanefndum þings, Kolbrún í velferðarnefnd og Sigurjón í atvinnuveganefnd.
Í upphafi ræðu sinnar sagði Kolbrún stefnumálum Flokks fólksins gert hátt undir höfði í stórhuga áherslum ríkisstjórnar Kristrúnar Frostadóttur.
„Þar má nefna áralanga baráttu fyrir því að samningur Sameinuðu þjóðanna um réttindi fatlaðs fólks verði lögfestur,“ sagði Kolbrún. En um þessar mundir eru átján ár frá því Íslendingar undirrituðu sáttmálann.
Undarleg andstaða við réttlætismál
„Það hefur verið undarlegt að fylgjast með andstöðu sumra þingmanna stjórnarandstöðunnar við þetta mikilvæga réttlætismál. Fullyrt hefur verið að hið opinbera hafi ekki efni á að uppfylla ákvæði samningsins. Að Íslendingar, ein ríkasta þjóð í heimi, hafi ekki efni á að tryggja réttindi fatlaðs fólks í lögum,“ sagði Kolbrún í ræðu sinni á Alþingi.
Eitt mikilvægasta frumvarp Ingu Sæland félags- og húsnæðismálaráðherra um almannatryggingar var einmitt afgreitt út úr velferðarnefnd í morgun og er tilbúið til annarrar umræðu. Kolbrún sagði ríkisstjórnina hafa tryggt fjármögnun breytinganna. Það væri mikilvægt skref í að eyða þeirri kjaragliðnun sem átt hefði sér stað á undanförnum áratug milli lífeyrisgreiðslna til elli- og örorkulífeyrisþega og lægstu launa.
„Í dag munar rúmlega hundrað þúsund krónum á hæstu elli- og örorkulífeyrisgreiðslum og lægstu launum á mánuði öldruðum og öryrkjum í óhag,“ sagði Kolbrún.
Almenningi misboðið áratugum saman
Sigurjón Þórðarson sagði þjóðina hafa kallað á breytingar í síðustu kosningum. „Þar sem almannahagsmunir yrðu látnir ráða för í stað þeirra sérhagsmuna sem fyrri stjórnarflokkar höfðu kappkostað að verja – þó oft hver í andstöðu við annan,“ sagði Sigurjón í ræðu sinni.
„Áratugum saman hafa stjórnvöld misboðið réttlætiskennd þjóðarinnar þegar kemur að innheimtu auðlindagjalda fyrir nýtingu á fiskveiðiauðlindum þjóðarinnar. Þar stóðu gömlu stjórnarflokkarnir þétt saman í vörnum sínum fyrir hagsmunum auðugustu fyrirtækja og einstaklinga landsins,“ sagði Sigurjón.
Þjóðin hafi gefið ríkisstjórn Flokks fólksins, Samfylkingarinnar og Viðreisnar skýrt umboð með ríflegan meirihluta 36 þingmanna á Alþingi.
„Með veiðigjaldafrumvarpi ríkisstjórnarinnar er ekki verið að ógna stöðu útgerðarfyrirtækja sem hafa skilað svo miklum hagnaði á undanförnum áratugum að þau eiga í erfiðleikum með að koma þeim fjármunum fyrir. Enda fjárfest fyrir milljarðatugi í óskildum atvinnugreinum.“
Sigurjón minnti jafnframt á að komið væri vel til móts við smærri útgerðir með ríflegum afslætti á veiðigjöldunum.
Leiðrétt veiðigjöld aðeins brot af hagnaði
Hækkun veiðigjalda samkvæmt frumvarpi atvinnuvegaráðherra væri aðeins brot af tugmilljarða hagnaði útgerðarinnar. Eftir leiðréttingu veiðigjaldanna greiddu útgerðirnar um 50 krónur fyrir kílóið af þorski sem væri einn tíundi af þeim 500 krónum sem sömu aðilar leigðu heimildirnar fyrir.
„Ólíkt fyrri ríkisstjórn ríkir mikil sátt um þá tugi mála sem stjórnarflokkarnir hafa lagt fram á yfirstandandi þingi,“ sagði Sigurjón. Hvort sem horft væri til breytinga á lögum um útlendinga, landamærin, málefni elli- og örorkulífeyrisþega eða auðlindir landsins, stæðu þingmenn stjórnarflokkanna saman sem einn.
„Spurningin er bara hvort stjórnarandstaðan virðir rétt mikils meirihluta á þingi til að koma þjóðþrifamálum hér áfram, eða hvort hún taki óeðlilega langan tíma til að ræða einstök mál, með málþófi, til að koma í veg fyrir réttlátar breytingar þjóðinni til heilla,“ sagði Sigurjón Þórðarson meðal annars í ræðu sinni í eldhúsdagsumræðum á Alþingi.
