Lögreglan á höfuðborgarsvæðinu var kölluð að hóteli í miðborginni á áttunda tímanum í morgun vegna alvarlegs atviks sem þar hafði orðið.
Rannsókn málsins er á algjöru frumstigi og því er ekki unnt að greina frá því nánar að svo stöddu.
Frekari upplýsingar verða sendar fjölmiðlum í dag, eða eftir því sem málinu vindur fram segir í tilkynningu lögreglu.
Einni hæð sagt hafa verið lokað
Samkvæmt heimildum mbl.is gerðist atvikið á Reykjavík Edition-hótelinu. Einni hæð hótelsins mun hafa verið lokað af sérsveit ríkislögreglustjóra og gestum sagt að halda sig inni á herbergjum sínum.
Ekki hefur náðst í lögregluna vegna málsins.
Helena Rós Sturludóttir, samskiptastjóri ríkislögreglustjóra, staðfestir að sérsveit ríkislögreglustjóra hafi verið kölluð út til aðstoðar lögreglunni á höfuborgarsvæðinu í morgun. Hún segir ágætis viðbúnað hafa verið á staðnum. Málið liggur núna hjá lögreglunni á höfuðborgarsvæðinu.
