70 ökumenn voru kærðir fyrir hraðakstur í umdæmi lögreglunnar á Suðurlandi í liðinni viku. Hraðast ók íslenskur karlmaður fæddur 1975 en bifreið hans mældist á 157 km/klst hraða á Suðurlandsvegi til móts við Oddgeirshóla. Annars er listinn yfir ríkisfang þeirra sem óku of hratt langur eða samtals frá 20 þjóðríkjum. N.t.t. svona: Litháen, Kína, Ítalía, Ísland, Rúmenía, Malasía, Bandaríkin, Grikkland, Argentína, Þýskaland, Pólland, Sviss, Bretland, Danmörk, Indland, Kólumbía, Lettland, Spánn, Taívan, Kanada og Albanía.
Tveir eru grunaðir um ölvun við akstur. Annar þeirra stöðvaður í Vík í gærkvöldi en sá er erlendur á ferðalagi hér um landið. Íslenskur ökumaður var færður til blóðsýnatöku á Kirkjubæjarklaustri þann 10. október eftir að lögreglumenn höfðu afskipti af honum á Suðurlandsvegi. Þá voru þrír aðilar stöðvaðir í liðinni viku grunaðir um að hafa ekið undir áhrifum fíkniefna. Tveir þeirra innanbæjar á Selfossi og sá þriðji á Biskupstungnabraut. Tveir þessarar þriggja reyndust sviptir ökurétti vegna fyrri brota.
Drengur fæddur 2007 slasaðist þegar framhjól datt undan reiðhjóli hans í Þorlákshöfn. Grunur leikur á að dekkið hafi verið losað af mannavöldun og má öllum vera ljóst hversu alvarlegt slíkt er. Málið er í rannsókn og eru þeir sem hafa upplýsingar um það hvattir til að hafa samband við lögreglu.
Maður var fluttur slasaður með þyrlu Landhelgisgæslunnar á sjúkrahús í Reykjavík þann 12. október s.l. eftir að hann hafði velt fjórhjóli sem hann ók ofan í skurð á túni á sveitabæ í Landeyjum. Ekki er vitað um líðan mannsins en hann áverkar hans voru ekki taldir lífshættulegir.
Bifreið var ekið yfir grasbala og á bekk við Olís við Arnberg á Selfossi aðfaranótt 11. október s.l og síðan af vettvangi. Ökumaður bifreiðarinnar hefur ekki gefið sig fram og því væri snjallt ef einhver gæti lagt okkur lið með að upplýsa hver var þarna á ferðinni.
Aðfaranótt 5. október var bifreið ekið á rafstýrt hlið við Öndverðanesafleggjara. Tjón varð á hliðinu en ökumaður þeirrar bifreiðar hefur ekki gefið sig fram ennþá. Eftirlitsmyndavél er við hliðið og því líkur á að það mál upplýsist.
Afskipti voru höfð af ökumönnum fjögurra ökutækja í vikunni vegna ófullnægjandi frágangs á farmi. Einn var að flytja túnþökur í rúllum. Brík var til varnar framskriði en ekkert studdi við til hliðanna. Annar var með þrjár lausar heyrúllur á kerru. Þriðji flutti malarfarm á palli án þess að hafa vör til að loka honum og sáldraðist möl yfir veginn. Tilkynnt var um þann fjórða en ökumaður bifreiðar sem hann mætti kvaðst hafa fengið grjót á bifreið sína þó svo tjón væri óverulegt og íllmögulegt að sýna fram á það þar sem bíllinn væri þegar með sína sögu um grjótbarning. Vörubifreiðin var stöðvuð á Vesturlandsvegi og rætt við ökumann hennar.
Drengur slasaðist er framhjól datt undan reiðhjóli, líklega losað af mannavöldun
Umræða
