Kristrún Frostadóttir forsætisráðherra hélt til Brussel þar sem hún átti vinnufund með Ursulu von der Leyen, forseta framkvæmdastjórnar Evrópusambandsins (ESB)
Á fundinum ræddu þær stöðu alþjóðamála, öryggis- og varnarmál, efnahags- og tollamál, málefni Evrópska efnahagssvæðisins og samstarf Íslands við ESB.
„Ég átti góðan fund með forseta framkvæmdastjórnarinnar í dag, þar sem við fórum yfir helstu sameiginlegu hagsmunamál Íslands og ESB. Við ræddum meðal annars losunarheimildir í flugi og sérstaka undanþágu Íslands sem rennur út í lok árs. Þetta er afar mikilvægt hagsmunamál fyrir íslenska flugrekendur og við áttum uppbyggilegt samtal um hugsanlegar lausnir fyrir Ísland,” segir forsætisráðherra.
„Öryggis-og varnarmál í álfunni og ekki síst hér á Norðurslóðum eru ofarlega í huga allra og áttum við einnig hreinskiptið samtal um stöðuna eins og hún blasir við núna. Við áréttuðum báðar afdráttarlausan stuðning okkar við Grænland og Danmörku,” segir Kristrún.
„Samskipti ESB og Íslands standa á afar traustum grunni og í ljósi aðstæðna er mikilvægt að halda áfram öflugri hagsmunagæslu við forsvarsmenn framkvæmdastjórnarinnar og aðildarríkja ESB.“
Vinnufundurinn í dag er liður í áframhaldandi samtali um samstarf Íslands og ESB en forsætisráðherra átti á síðasta ári tvo fundi með forseta framkvæmdastjórnar ESB, þann fyrri í Brussel í apríl og þann síðari á Íslandi í júlí.
