Mohamad Kourani, sem ákærður var fyrir stunguárás í versluninni OK Market ásamt ýmsum brotum gegn valdstjórninni, var dæmdur í átta ára fangelsi í Héraðsdómi Reykjavíkur rétt upp úr klukkan 11 í morgun.
Auk þess var Kourani gert að greiða 4.814.365 krónur í sakarkostnað og annars vegar eina og hálfa milljón og hins vegar 750.000 í miskabætur, ásamt vöxtum. Þá var hnífsblað og hnífsskefti í eigu hans gert upptækt. Ríkisútvarpið greindi frá:
Verjandi og saksóknari boðuðu forföll og því voru eingöngu blaðamenn í dómssal, auk dómara.
Refsingin er í samræmi við kröfu Friðriks Smára Björgvinssonar, saksóknara í málinu, sem krafðist 6 – 8 ára fangelsis yfir Kourani við aðalmeðferð málsins í byrjun mánaðarins.
Ákæran gegn Kourani var í sex liðum og var hann fundinn sekur um alla liðina. Tveir þeirra snúa að stunguárás í OK Market við Hlíðarenda í mars. Þar var Kourani ákærður fyrir að hafa stungið mann í andlitið og fyrir að hafa veist að öðrum manni í versluninni sem reyndi að koma hinum til aðstoðar.
Hótaði lögreglumanni og fjölskyldu hans lífláti
Fjórir liðir ákærunnar snúa að brotum gegn valdstjórninni. Þar var Kourani ákærður fyrir að hafa hrækt á fangavörð á Litla-Hrauni í júní í fyrra og að hafa skvett vökva af óþekktu tagi, mögulega þvagi, framan í annan. Í ákæruliðnum í dómnum segir að Khourani hafi verið „erfiður fangi“. Sjálfur sagði hann fangaverðina ljúga upp á sig.
Þá var hann ákærður fyrir að hafa í mars, degi eftir hnífsstunguárásina, hótað lögreglumanni á lögreglustöðinni við Hverfisgötu og hafa hótað fjölskyldu hans lífláti. Einnig fyrir að hafa hrækt í andlit lögreglumanns í Héraðsdómi Reykjavíkur við Lækjartorg þann sama dag. Ekki kom fram í dómsorði fyrir hversu marga ákæruliði Kourani var dæmdur, en dómurinn verður birtur síðar í dag.
Hótaði vararíkissaksóknara
Helgi Magnús Gunnarsson vararíkissaksóknari greindi frá því fyrr á þessu ári að Kourani hefði ítrekað haft í hótunum við sig og fjölskyldu sína í kjölfar niðurfellingar á kæru Kouranis á hendur öðrum manni, sem Helgi staðfesti fyrir hönd embættis ríkissaksóknara. Hann hefði í kjölfarið hótað að myrða Helga og fjölskyldu hans, ítrekað mætt á skrifstofu hans og haft þar í hótunum. Kourani var dæmdur fyrir þær hótanir í Héraðsdómi Reykjaness 2022 og var sá dómur síðan staðfestur af Landsrétti í fyrra.
Í dómnum er vísað til áhættumats lögreglu síðan í mars. Þar er greint frá ítrekaðri ofbeldishegðun og hótunum Kouranis undanfarin ár og sú ályktun dregin að hann sé mjög líklegur til að halda slíku áfram.
„Auk brotaþola í þessu máli eru líklegir þolendur taldir allir sem veita ákærða þjónustu, hvort heldur starfsmenn félagsþjónustu, Landspítala, lögreglu eða annarra opinberra stofnanna sem ákærði telur hafa brotið gegn honum, sem og lögfræðingar sem ákærði leitar til. Eftir atvikum megi draga úr þeirri hættu sem frá honum stafar ef ákærði fær markvissa þjónustu og virkt utanumhald fagaðila, sem geti leiðbeint honum um hegðun og andlega og félagslega heilsu,“ segir í dómnum.
Þar segir ennfremur að Kourani hafi til þessa sýnt lítinn vilja til að nýta sér slíka þjónustu og þyrfti hún því að vera skyldubundin til að byrja með. Gangi það ekki eftir sé það mat lögreglu að nauðsynlegt sé að hann verði í gæsluvarðhaldi til að vernda mögulega þolendur fyrir ofbeldishegðun hans.
Fjölmörg brot og þrír aðrir dómar
Í dómnum eru fyrri dómar yfir Kourani raktir, en hann kom hingað til lands í byrjun árs 2017 og sótti þá um alþjóðlega vernd sem hann fékk í maí 2018. Í millitíðinni, eða í desember 2017, var hann dæmdur í 30 daga fangelsi fyrir skjalabrot.
Í mars í fyrra var hann dæmdur í 12 mánaða fangelsi fyrir ýmsar sakir; líkamsárás, húsbrot, brot gegn nálgunarbanni, eignaspjöll, fimm brot gegn valdstjórninni, tvær sprengjuhótanir, skjalafals, vopnalagabrot, umferðarlagabrot og sjö brot gegn sóttvarnarlögum. Þeirri afplánun lauk hann í lok janúar síðastliðins.
Skömmu eftir það, eða um miðjan mars, var hann dæmdur í 14 mánaða fangelsi fyrir líkamsárás, valdstjórnarbrot, sprengjuhótun, tilraun til sprengjuhótunar og umferðarlagabrot. Sætir sá dómur áfrýjun fyrir Landrétti.
Fréttin var uppfærð með ítarlegri upplýsingum um dóm Kouranis og brot hans. Þá var bætt við atriðum úr dóminum eftir að hann barst fréttastofu rúv.