Dómsmálaráðherra leggur skýra áherslu á öryggi og einföldun með fjárlögum ársins 2026. Heildarfjárframlög sem heyra undir ráðuneytið nema rúmum 73 milljörðum króna, eða um 4,5% af áætluðum útgjöldum ríkissjóðs.
Stærsti hluti fjárveitinganna fer í öryggismál. Þar undir falla lögregla, Landhelgisgæsla, ákæruvald og fangelsismál, þar sem útgjöld nema rúmum 50 milljörðum króna. Það er 12,7% hækkun frá fjárlögum ársins 2025.
„Öryggi landsmanna er forgangsmál og borgaralegir innviðir eru fremsta lína varna. Lögregla, Landhelgisgæsla og almannavarnir tryggja öryggi þjóðarinnar á hverjum degi og við ætlum að styrkja þessa innviði,“ segir Þorbjörg S. Gunnlaugsdóttir dómsmálaráðherra.
Þriðjungs lækkun á útgjöldum vegna útlendingamála
Í fjárlögum er gert ráð fyrir rúmlega 30% lækkun á útgjöldum vegna útlendingamála. Fjárveitingar í málaflokknum verða 6,5 milljarðar árið 2026, samanborið við 9,5 milljarða á árinu 2025.
„Við erum að stíga stór skref til að ná útgjöldum niður. Nú er gert ráð fyrir 6,5 milljörðum árið 2026 í þessum málaflokki sem er 30% lækkun frá fjárlögum 2025, og næstum 60% lækkun frá raunkostnaði síðasta árs. Þetta gerist ekki að sjálfu sér, þetta gerist með skýrri stefnu og með því að hafa stjórn á aðstæðum,“ segir ráðherra.
Dómsmálaráðherra ráðgerir að leggja fram fimm frumvörp á 157. löggjafarþingi í málaflokknum, m.a. um hert skilyrði vegna umsókna um dvalarleyfi ásamt frumvarpi sem gerir stjórnvöldum kleift að afturkalla alþjóðlega vernd þeirra sem framið hafa alvarleg eða ítrekuð brot, sem og þeirra sem ógna öryggi ríkisins.
Auknar fjárheimildir til Landhelgisgæslu og fangelsismála
Meðal helstu verkefna er fjölgun lögreglumanna um 50 og stofnun brottfararstöðvar sem verður notuð sem lokaúrræði þegar brottvísa á útlendingi og hann neitar samvinnu. Þá er gert ráð fyrir viðbótarfjárframlagi til Fangelsismálastofnunar upp á 230 milljónir króna, m.a. til að tryggja aukið öryggi starfsfólks og fanga.
„Það er alveg skýrt að refsidómar mega ekki fyrnast. Það grefur undan trausti almennings á réttarkerfinu. Þess vegna er forgangsmál að nýta öll tiltæk úrræði til að létta á fangelsum landsins. Brottfararstöðin er liður í því,“ segir ráðherra.
Fjárheimild til reksturs Landhelgisgæslunnar er aukin um 1,3 milljarða með það að markmiði að tryggja öryggi og eftirlit í auðlindalögsögu Íslands og styrkja með því áfallaþol þjóðarinnar.
Á sama tíma eru tekin skref til einföldunar og hagræðingar. Dómstólar eru áfram undanskildir almennu aðhaldi og vinna heldur áfram að uppbyggingu réttarvörslugáttar sem m.a. hefur bætt þjónustu við þolendur. Þá verða gerðar breytingar á jafnlaunakerfi þannig að skylda til jafnlaunavottunar verður aflögð í núverandi mynd og einfaldara kerfi tekur við. Sama markmið um launajafnrétti verður tryggt, en með minni kostnaði fyrir bæði atvinnulíf og hið opinbera.
„Þetta eru ábyrg fjárlög sem styrkja grunnstoðir samfélagsins. Við erum að tryggja öryggi með því að byggja upp trausta borgaralega innviði, en á sama tíma að hagræða og einfalda þar sem þess er þörf,“ segir Þorbjörg S. Gunnlaugsdóttir dómsmálaráðherra.
Nánari upplýsingar um fjárlög fyrir árið 2026 má nálgast hér.
