Húsbréf sem gefin voru út af Íbúðalánasjóði/ÍL-sjóði fyrir árið 2004 hafa verið dregin út á grundvelli útdráttarheimildar. Eigendur pappírsbréfa eru hvattir til að leysa þau út gegn greiðslu hjá Fjársýslu ríkisins frá og með 15. desember. Sérstök athygli er vakin á því að bréfin bera ekki lengur vexti eða verðbætur. Eigendur þurfa að framvísa skilríkjum og ef verið er að innleysa bréf fyrir dánarbú þarf umboð að fylgja. Nauðsynlegt er að framsalsröðin á bréfinu sé óslitin.
Móttaka Fjársýslunnar er í Katrínartúni 6, 105 Reykjavík og er opin mánudaga til fimmtudaga, milli 9-15 og á föstudögum 9-13.
Frá því vorið 2022 hefur verið unnið markvisst að því að skapa skilyrði til að hægt sé að gera upp skuldir ÍL-sjóðs og slíta honum. Með samþykki meirihluta eigenda HFF íbúðabréfa vorið 2025 og samþykktfjáraukalaga nr. 319/2025, var framkvæmt uppgjör við alla eigendur HFF íbúðabréfa þar sem þeir tóku við samblandi af eignum ÍL-sjóðs auk ríkisskuldabréfa og gjaldeyris frá ríkissjóði.
Í framhaldi uppgjörsins var eigendum húsnæðisbréfa boðið að skipta á þeim og ríkisskuldabréfum auk þess sem eldri húsbréfaútgáfur hafa verið í sérstöku uppgjörsferli þar sem heimildir til útdráttar hafa verið nýttar. Stefnt er að því að lögaðilinn ÍL-sjóður verði lagður niður um áramótin 2025-2026 og hefur verið óskað eftir lagaheimild til að fella niður lög nr. 151/2019 um úrvinnslu eigna og skulda ÍL-sjóðs. Við brottfall laganna tekur ríkissjóður við öllum eftirstandandi réttindum og skyldum ÍL-sjóðs.
