Talsmenn fatlaðs fólks tilnefndir á Alþingi

Þingflokkar á Alþingi hafa nú í fyrsta sinn tilnefnt talsmenn fatlaðs fólks. Hlutverk talsmannanna er að gæta hagsmuna fatlaðs fólks á þinginu og tryggja farveg fyrir sjónarmið fatlaðra. Skipan talsmannanna er hluti af Landsáætlun í málefnum fatlaðs fólks sem Alþingi samþykkti í fyrra – og þáttur í innleiðingu samnings Sameinuðu þjóðanna um réttindi fatlaðs fólks sem Ísland lögfesti nú í vikunni.

Aðgerðin í landsáætluninni er á ábyrgð félags- og húsnæðismálaráðherra og voru allir þingflokkarnir beðnir um að tilnefna einn talsmann úr hverjum flokki. Talsmennirnir fengu í dag fræðslu um samning Sameinuðu þjóðanna um réttindi fatlaðs fólks, heyrðu reynslusögur fatlaðs fólk og kynntust reynsluheimi þeirra.

„Þetta er risastór vika fyrir fatlað fólk á Íslandi,“ segir Inga Sæland, félags- og húsnæðismálaráðherra. „Eftir áralanga baráttu lögfesti Ísland loks samning Sameinuðu þjóðanna um réttindi fatlaðs fólks nú á miðvikudag. Mörg gleðitár féllu í samfélaginu og það var dásamlegt að verða vitni að því. Nú erum við síðan komin með talsmenn fatlaðs fólks á Alþingi og það er mikilvægt því rödd fatlaðs fólks verður að heyrast.“

Um fræðsluna í dag sáu Alma Ýr Ingólfsdóttir, formaður ÖBÍ réttindasamtaka, Sigurborg Sveinsdóttir, ritari Geðhjálpar, Fabiana Morais, talskona fatlaðs fólks hjá Landssamtökunum Þroskahjálp, og Ásta Kristín Benediktsdóttir, sérfræðingur í félags- og húsnæðismálaráðuneytinu. Góðar og líflegar umræður spunnust um réttindi fatlaðs fólks og hlutverk talsmanna.

Eftirfarandi tilnefningar bárust um talsmenn fatlaðs fólks á Alþingi:

• Grímur Grímsson, þingmaður Viðreisnar
• Halla Hrund Logadóttir, þingmaður Framsóknar
• Kolbrún Áslaugar Baldursdóttir, þingmaður Flokks fólksins
• Ólafur Adolfsson, þingmaður Sjálfstæðisflokksins
• Sigmundur Ernir Rúnarsson, þingmaður Samfylkingarinnar

Við lok fræðslunnar í dag undirrituðu þingmennirnir skjal með eftirfarandi texta:

Sem talsmenn fatlaðs fólks heitum við því að hafa samning Sameinuðu þjóðanna um réttindi fatlaðs fólks að leiðarljósi í störfum okkar og gæta réttinda og hagsmuna fatlaðs fólks.

Sem talsmenn fatlaðs fólks munum við fræða samflokksfólk okkar um réttindi fatlaðs fólks. 

Sem talsmenn fatlaðs fólks munum við leitast við að tryggja að fatlað fólk fái tækifæri til að koma sjónarmiðum sínum á framfæri við þingmenn áður en teknar eru ákvarðanir sem það varða.

Þingmennirnir við undirritunina. Halla Hrund Logadóttir, þingmaður Framsóknar, hélt erindi á Akureyri á sama tíma og undirritar skjalið því eftir helgi.

Kolbrún Áslaugar Baldursdóttir, Sigmundur Ernir Rúnarsson, Ólafur Adolfsson og Grímur Grímsson.

Skjalið undirrituðu einnig félags- og húsnæðismálaráðherra og fulltrúar hagsmunasamtaka fatlaðs fólks. Á myndinni eru Elín Ebba Ásmundsdóttir, varaformaður Geðhjálpar, Alma Ýr Ingólfsdóttir, formaður ÖBÍ réttindasamtaka, Inga Sæland, félags- og húsnæðismálaráðherra og Guðmundur Ármann Pétursson, formaður Landssamtakanna Þroskahjálpar.

Allir aðstandendur verkefnisins halda hér á dagatölum sem dreift verður til þingmanna þar sem merktar eru inn lykildagsetningar sem tengjast fötluðu fólki. Dagatalið tengist vitundarvakningunni Fyrir okkur öll.

Skjalið sjálft.