Fjármála- og efnahagsráðherra hefur lagt fram frumvarp á Alþingi um stofnun innviðafélags í eigu ríkisins sem ætlað er að hraða uppbyggingu stórra og þjóðhagslega mikilvægra samgönguverkefna. Markmiðið er að skapa skýra og sjálfbæra umgjörð um fjármögnun og framkvæmd samgöngumannvirkja.
Starfar á sjálfbærum fjárhagslegum grunni
Lagt er til að innviðafélagið verði opinbert hlutfélag í eigu ríkisins sem annist fjármögnun, þróun, uppbyggingu og rekstur tiltekinna samgönguinnviða á grundvelli samninga við innviðaráðuneytið. Félagið starfi á sjálfbærum fjárhagslegum grunni og fjármagni framkvæmdir með veggjöldum og lántöku á markaði. Horft er til reynslu nágrannalanda sem hafa stofnað sérstök innviðafélög í sama tilgangi.
Unnið á innviðaskuld í samgöngum
Í stefnuyfirlýsingu ríkisstjórnarinnar er lögð áhersla á að auka fjárfestingar í samgöngum og hefja kraftmiklar framkvæmdir um allt land ásamt því að rjúfa kyrrstöðu í jarðgangagerð og vinna á viðhaldsskuld í vegakerfinu. Stofnun innviðafélags er lykill að því markmiði.
Með stofnun sérstaks félags sem starfar á sjálfbærum grunni er horft til þess að mikilvæg innviðauppbygging raungerist í samgöngumálum sem að öðrum kosti yrði ekki að veruleika. Aukin áhersla verður jafnframt á að framkvæmdaverkefni verði innan kostnaðar- og tímaramma og mun fjármagnsskipan félagsins taka mið af því.
Meðal ávinnings af því að flýta samgönguframkvæmdum er aukið umferðaröryggi, stytting umferðarleiða og bætt tenging milli byggða og atvinnusvæða til hagsbóta fyrir íbúa og fyrirtæki um allt land.
„Við vitum öll að það er verk að vinna þegar kemur að samgöngumálum. Með þessu frumvarpi erum við að leggja til nýja aðferðafræði til þess að takast á við brýn og stór innviðaverkefni,“ segir fjármála- og efnahagsráðherra.“
Frumvarpið fær nú þinglega meðferð en vonast er til að hægt verði að koma félaginu á fót um mitt þetta ár þannig að það geti strax hafið undirbúning á þeim verkefnum sem færð verða til félagsins. Er í því samhengi einkum horft til Sundabrautar, Fljótaganga og fjármögnunar Ölfusárbrúar.
