Sigmundur Davíð svarar fyrir sig: „Þessir eru enn við sama heygarðshornið”
Frétt RÚV
Þessir eru enn við sama heygarðshornið. Hér er viljandi sett fram villandi fyrirsögn og auk þess gefið í skyn í greininni að ég hafi greitt fyrir rekstur síðunnar Veggurinn.is.
Loks er gefið til kynna að ég hafi greitt fyrir vinnu sem var unnin þegar ég var „nýfallinn sem formaður Framsóknarflokksins”. Það er rangt.
Sá útlagði kostnaður sem ég ábyrgðist fyrir flokkinn kom allur til á meðan ég var formaður hans og löngu áður en andstæðingar mínir í flokknum hófu sínar aðgerðir (og um það leyti sem þeir lýstu því yfir að ekki kæmi til greina að fara gegn mér og sögðu að ég væri að sinna því mikilvæga hlutverki að undirbúa kosningabaráttu flokksins).
Ég kom ekkert að stofnun vefsíðunnar Veggsins og bauðst aldrei til að greiða fyrir síðuna eða fréttir á henni né var ég beðinn um það.Síðan var að vísu oft á sömu línu og ég og Framsóknarflokkurinn á þeim tíma í stórum málum eins og viðureigninni við vogunarsjóði, baráttunni við verðtryggingu, mikilvægi byggðamála ofl. (og þ.a.l. á annarri línu en Rúv).
Síðan fjallaði líka mikið um þá sem hafa verið leiðandi í baráttunni fyrir breytingum í verkalýðshreyfingunni, lífeyrissjóði, orkumál og ýmislegt fleira. Og jú, ég man ekki betur en að síðan hafi verið gagnrýnin á Rúv. Þar liggur e.t.v. hundurinn grafinn.
Ég setti hins vegar upp síðuna panamaskjolin.is til að birta allar upplýsingar og svör við öllum spurningum um þau mál (því ekki gerði rúv það). Það er ótengt þessu.
Það kom ýmislegt áhugavert fram í réttarhöldunum í málinu sem vísað er til en það virðist enginn áhugi vera á því hjá „aðdáendaklúbbnum” sem hengdi „skotmarksmynd” af mér upp á vegg fréttastofunnar.
Svo segi ég eins og Dagur, er ekki hægt að birta skárri mynd af mér með fréttinni? (Þótt ég viðurkenni reyndar að í mínu tilviki gæti það verið erfitt).
