Ríkisendurskoðandi áritar ársreikninga ríkisfyrirtækja án þess að vera löggiltur endurskoðandi – Ferilskrá er hér að neðan
Fjallað er ítarlega um málið á vef ríkisútvarpsins og þar segir að heimild hans til þess er umdeild. ,,Hann telur heimild sína óvéfengjanlega en endurskoðendaráð, sem sinnir gæðaeftirliti með störfum endurskoðenda, hefur vísað málinu til lögreglu og Félag löggiltra endurskoðenda hefur vísað málinu til atvinnuvegaráðuneytisins og til ESA, eftirlitsstofnunar EFTA-dómstólsins.
Ákvæði um að ríkisendurskoðandi skyldi vera löggiltur endurskoðandi var fellt úr lögum um ríkisendurskoðanda með breytingu á lögunum 2016. Í greinargerð með frumvarpinu segir um 21. grein, sem fjallar um gildissvið laganna gagnvart lögum um endurskoðun, að ekki sé gert ráð fyrir því að ríkisendurskoðandi sinni sjálfur endurskoðun. Í greinargerðinni segir einnig að viðbúið væri að lítið myndi reyna á ákvæðið í framkvæmd.
Guðmundur Björgvin Helgason, sem kosinn var ríkisendurskoðandi til sex ára af Alþingi frá 2022, er annar ríkisendurskoðandi til að gegna embættinu án þess að hafa starfsleyfi sem endurskoðandi, en sá fyrsti sem áritar ársreikninga ríkisfyrirtækja án þess að löggiltur endurskoðandi sem starfar hjá embættinu áriti með honum.
Þrír starfsmenn Ríkisendurskoðunar sviptir starfsleyfi
Endurskoðendaráð svipti þrjá starfsmenn ríkisendurskoðanda starfsleyfi sem löggiltir endurskoðendur tímabundið eftir að þeir árituðu ársreikninga þriggja ríkisfyrirtækja í fyrra en neituðu, með vísan í afstöðu ríkisendurskoðanda, að afhenda endurskoðendaráði gögn.
Síðan þá hefur Guðmundur Björgvin ríkisendurskoðandi áritað ársreikningana einn. Hann segist gera það því ríkisendurskoðandi eigi að bera fulla ábyrgð á árituninni. Þá vilji hann ekki setja starfsfólk sitt í skotlínu endurskoðendaráðs, eins og hann orðaði það í samtali við fréttastofu ríkisútvarpsins.“
Hér er hægt að skoða ferilskrá ríkisendurskoðanda og menntun
