Daði Már Kristófersson, fjármála- og efnahagsráðherra, hefur skrifað undir samkomulag við Háskólann í Reykjavík og Verkfræðingafélag Íslands um nýjan samráðsvettvang um verkefnastjórnsýslu og opinberar fjárfestingar. Tilgangurinn er að efla samstarf milli ráðuneytisins, HR og Verkfræðingafélagsins á þessu sviði, stuðla að þróun bestu starfsvenja í stjórnsýslu, tengja saman þekkingu og draga fram bestu aðferðir.
Fimm fulltrúar skipa samráðsvettvanginn og eru þrír þeirra valdir af fjármála- og efnahagsráðherra, og einn frá HR og einn frá Verkfræðingafélaginu. Samkomulagið gildir til ársloka 2027.
„Fjárfestingar á vegum hins opinbera eru umfangsmiklar og margvíslegar. Til þeirra renna miklir fjármunir og mikilvægt að allar ákvarðanir, frá upphafi til enda, séu vandaðar og yfirvegaðar.” segir Daði Már Kristófersson, fjármálaráðherra og heldur áfram „frá mínum sjónarhóli sem fjármálaráðherra er því til mikils að vinna að ávallt sé beitt bestu aðferðum í stjórnsýslu, sérstaklega í undirbúningi, mati, fjármögnun, framkvæmd og eftirfylgni opinberra fjárfestingarverkefna. Samráðsvettvangurinn er hugsaður sem mikilvægt verkfæri í því verkefni. Ég er afar ánægður með að við vinnum að þessu með Háskólanum í Reykjavík og Verkfræðingafélagi Íslands“.
Samkomulagið var auk fjármálaráðherra undirritað af Ragnhildi Helgadóttur rektor Háskólans í Reykjavík og Helga Gunnarssyni formanni Verkfræðingafélags Íslands.
Helgi Þór Ingason, Svana Helen Björnsdóttir, Hermann Sæmundsson, Katrín Oddsdóttir, Gunnar Sigurðsson, Helgi Gunnarsson, Daði Már Kristófersson og Ragnhildur Helgadóttir.
Hlutverk samráðsvettvangsins er:
- Að miðla þekkingu á sviði verkefnastjórnar, fjárfestingarmats og gæðamats.
- Að meta kosti og galla verkefnastjórnsýslukerfa og rannsaka hvað gæti hentað fyrir íslenska stjórnsýslu.
- Að leggja mat á hvernig akademísk þekking og rannsóknir geti nýst við stefnumótun og framkvæmd opinberra fjárfestinga.
- Að fjalla um tækifæri til sameiginlegra rannsókna, fræðslu, útgáfu rita og þróunarverkefna á þessu sviði.
- Að leggja til umbætur í verklagi og stjórnsýslu fjárfestingarverkefna hjá hinu opinbera.
- Að meta möguleika og gagnsemi stofnunar samstarfsvettvangs með fleiri lykilhagsmunaaðilum á sviði verkefnastjórnsýslu og opinberra fjárfestinga
Eftirtalin eiga sæti í samráðsvettvanginum:
Hermann Sæmundsson, ráðuneytisstjóri fjármála- og efnahagsráðuneytisins
Gunnar Sigurðsson, sérfræðingur í fjármála- og efnahagsráðuneytinu
Katrín Oddsdóttir, sérfræðingur í fjármála- og efnahagráðuneytinu
Helgi Þór Ingason prófessor við verkfræðideild HR, fulltrúi Háskólans í Reykjavík
Svana Helen Björnsdóttir verkfræðingur, fulltrúi Verkfræðingafélags Íslands
