Vörukarfa Verðlagseftirlits ASÍ hækkaði um 0,68%, í verði milli febrúar og mars, og nemur uppsöfnuð hækkun á árinu tæpum tveimur prósentum. Hefur matvöruverð því hækkað meira á fyrstu þrem mánuðum ársins en í byrjun síðasta árs.
Mánaðarhækkunin er þvert á vöruflokka. Mestu munar um unnar kjöt- og mjólkurvörur, en sælgæti og aðrar dýraafurðir hækka einnig. Appelsínur og fleiri ávextir lækka hins vegar í verði milli mánaða, sem og sveppir, rótarhnýði & laukur.
Matvara hækkar víðast hvar
Það sem af er ári mælast mestar hækkanir í Fjarðarkaupum (3,0%), Nettó (2,3%) og Bónus (2,0%). Gera verður þann fyrirvara að mælingar í Fjarðarkaupum fyrir marsmánuð liggja ekki fyrir við vinnslu þessarar fréttar og er því miðað við febrúartölur í þeirra tilfelli. Vöruverð í Krambúðinni lækkaði um 2,4 prósentur. Extra er sú verslun hvar vöruverð jókst mest milli febrúar og mars (7,6%). Þessa umtalsverðu hækkun má að mestu skýra með skarpri verðlækkun verslunarinnar milli janúar og febrúar (-3,9%). Þar á eftir koma Krambúðin (1,4% hækkun) og Nettó (1,3%). Minnstar mánaðarhækkanir mældust hjá Krónunni og Prís, eða um 0,3 prósent.
Hvar er ódýrast að versla?
Verðlagseftirlitið heldur úti mælikvarða yfir hvar ódýrast er að versla. Hann byggir á meðaltölum yfir hve mikið dýrari vara er hverju sinni en þar sem varan er ódýrust.
Á þann mælikvarða er vöruverð almennt lægst í Prís, þar sem meðalfrávik frá lægsta verði sömu vöru er 0,05%. Þar á eftir er verðlag lægst í Bónus (4,3% meðalfrávik) og Krónunni (4,8% meðalfrávik).
Í verslunum 10-11 er vöruverð, aftur á móti, umtalsvert hærra í samanburði við ódýrasta valmöguleika, eða tæpum 72% dýrari að jafnaði.
Sökum ófyrirséðra atburða reyndist ekki unnt að ljúka vinnslu athugana í verslun Fjarðarkaupa, sem alla jafna er hluti af samanburði verðlagseftirlitsins. Niðurstöðurnar skoðist í því ljósi.
