Árið 2024 voru heildar iðgjaldatekjur af skaðatryggingum 91 milljarður króna og rekstrarkostnaður rúmlega 17 milljarðar. Hlutfall kostnaðar af tekjum var um 19%. Fyrir níu árum, 2016, var þetta kostnaðarhlutfall svipað, eða 21%.
Kostnaður við rekstur tryggingafélaganna er nánast sama hlutfall af tekjum frá ári til árs, í kringum fimmtung. Samt hefur allri tækni og sjálfvirkni í rekstri félaganna fleygt fram á ljóshraða. Ætla mætti að kostnaður færi lækkandi, til að mynda í allri fjármálaumsýslu líkt og hjá bönkunum. Svo virðist þó ekki. FÍB fór yfir málið.
Hár kostnaður við örorkumat
Bílatryggingar eru stærsti einstaki liður skaðatrygginga, um 60%. Iðgjaldatekjur bílatrygginga námu 54 milljörðum króna og rekstrarkostnaður var 10 milljarðar árið 2024. Tæpur þriðjungur rekstrarkostnaðarins er við örorkumat vegna bílslysa.
Fram kom í FÍB blaðinu í mars 2024 að sá kostnaður væri um 3 milljarðar króna á ári. Stærsti hlutinn rennur til lækna, lögfræðinga og annarra sérfræðinga sem ýmist gæta hagsmuna tryggingafélaganna eða tjónþola.
Tryggingafélögin hafa kallað eftir breyttu vinnulagi við matsgerðina, að miðlæg stofnun annist örorkumatið og þannig verði hagsmunatengsl rofin, traust bætt og samræmi aukið. Engu að síður bólar ekkert á breytingum þó svo að 12 ár séu liðin frá því að Samtök fjármálafyrirtækja (SFF) sendu frá sér hvatningu þesss efnis.
Tryggingafélögin virðast ekki hafa þrýst sérstaklega á þessar breytingar. Í umfjöllun FÍB blaðsins kom reyndar fram að félögin teldu að kostnaður myndi lítið lækka þó svo að miðlæg stofnun tæki við örorkumatinu. Fyrir bíleigendur lítur því ekki út sem iðgjöld fari eitthvað lækkandi á næstu árum.
