Ferðamálastofa kynnir fyrirlestur með fyrstu formlegu spám á vegum stofnunarinnar um fjölda erlendra ferðamanna, gistinátta þeirra og eyðslu hér á landi. Spárnar spanna allt frá næstu mánuðum og til ársins 2025.
Fyrirlesturinn verður sendur út í beinu streymi á Facebook fimmtudaginn 20. október 2022, kl. 11.00. Gestir geta tengst útsendingunni á Facebook síðu viðburðarins. Hægt verður að senda inn spurningar á meðan á fyrirlestrinum stendur.
Eingöngu er um útsendingu að ræða, þ.e. almenningi er ekki boðið á staðinn, en fjölmiðlar eru að sjálfsögðu velkomnir. Við verðum hjá Ferðamálastofu, Geirsgötu 9 í Reykjavík, 4. hæð. Best væri að láta vita af komu sinni fyrirfram með því að senda póst á johann@ferdamalastofa.is
Í fyrirlestrinum mun Dr. Gunnar Haraldsson hjá ráðgjafarfyrirtækinu Intellecta kynna spárnar, helstu forsendur þeirra og niðurstöður. Gunnar hefur leitt vinnu við þróun spákerfis um erlenda ferðamenn hér á landi fyrir Ferðamálastofu, í verkefni sem hrundið var af stað haustið 2020. Tilgangur verkefnisins er m.a. að styrkja forsendur stefnumótunar fyrirtækja í greininni, stjórnvalda og annarra sem hag hafa af þróun hennar.
Í kjölfar fyrirlestrarins verður gefin út skýrsla Intellecon um sama efni, sem birt verður á vef Ferðamálstofu. Þar verður einnig aðgengileg upptaka af fyrirlestrinum.
