Mjög góð mæting var á aðalfund Miðflokksdeildar Garðabæjar nú í kvöld. Formaður flokksins, Sigmundar Davíðs Gunnlaugssonar mætti ásamt Gunnari Braga Sveinssyni þingmanni kjördæmisins. Fundurinn var haldinn í fundarsalnum Sveinatungu á ráðhústorginu í Garðabæ.
Farið var yfir stöðuna í þjóðmálunum og m.a. rætt um fjárlagafrumvarpið sem var til vinnslu í þinginu í s.l. viku. Þá voru auðlindarmál rædd og lagði formaðurinn áherslu á það í ræðu sinni að íslendingar yrðu að verja sínar auðlindir og eignarhald á þeim.
Nýlegt dæmi er Orkupakkamálið og allt það ferli í kringum það og fór Sigmundur Davíð nokkrum orðum um það mál. Jafnframt benti hann á nauðsyn þess að standa vörð um íslenska matvælaframleiðslu og heilnæmi hennar.
Þá var rætt um auðlindir sjávar og sveita og að standa þyrfti vörð um nýtingu og eignarhald íslendinga á þeim náttúruauðlindum sem Ísland væri ríkt af.
Þjóðin þyrfti að standa í lappirnar gagnvart ofríki og yfirgangi ESB og þyrfti fyrst og fremst að standa með sjálfri sér og hafa trú á því að ekki væri nauðsynlegt að lúta yfirráðum erlendis frá.
Íslendingar hefðu t.d. fyrir áratug í hruninu, best séð hversu nauðsynlegt það er að hafa öfluga matvælaframleiðslu og vera sjálfum sér nægir á því sviði og spara þannig t.d. gjaldeyri.
Útþensla báknsins
Sigmundur Davíð ræddi um fjárlögin og vakti athygli á því að nú væri ríkið að fá meira tekjur en hefði sést áður en samt væri það ekki nóg. Útþensla báknsins hefði margfaldast og á því þyrfti að taka eins og boðað hefur verið. Hann sagði að mikill fjöldi hefði haft samband og bent á það sem betur mætti fara í „kerfinu og bákninu“ Reynslusögur hefðu streymt til flokksins sem læra mætti af.
Þá fjallaði hann um eldri borgara og fleiri hópa og sagðist ítreka það nú eins og oft áður, að í þeim málaflokki þyrfti virkilega að taka til hendinni og rétta hlut þessa hópa. Skerðingarnar væru ósanngjarnar og engin hvati væri fyrir fólk sem eru í hópi eldri borgara eða öryrkja til þess að bæta lífsgæði sín. Kerfið hamlaði og refsaði slíkum tilraunum fólks, til sjálfsbjargar. Þá voru ýmis mál rædd og fundargestir komu með fyrirspurnir sem þeir fengu svör við eins og venja er á aðalfundi sem þessum og ný stjórn kosin og önnur aðalfundarstörf afgreidd. Una María Óskarsdóttir varaþingmaður og formaður Miðflokksfélags Suðvesturkjördæmis tók myndir af stemmingunni sem var mjög góð og létt var yfir fundarfólki og bjartsýni með góða vinnu hér eftir sem hingað til.
