Mennta- og barnamálaráðherra hefur innleitt nýtt skipurit og verklag í kjölfar mats á hlutverki og verkefnum ráðuneytisins. Markmið breytinganna er að styrkja faglega stjórnsýslu, skýra ábyrgð og umboð, bæta ákvarðanatöku og tryggja að ráðuneytið sé enn betur í stakk búið til að sinna lögbundnu hlutverki sínu á sviði mennta- og barnamála. Breytingarnar fela í sér endurskipulagningu skrifstofa og breytta verkaskiptingu.
Með þeim á að skýra ábyrgð og auka gagnsæi um leið. Dregið verður úr yfirbyggingu um leið og fagleg sérþekking og sérhæfing innan málaflokka er styrkt. Áfram verður vel stutt við samhæfingu barna- og menntamála.
„Með breytingunum nú viljum við einfalda verklag og gera það skilvirkara. Við viljum lyfta upp menntamálum og setja aukinn slagkraft í málefni barna í viðkvæmri stöðu. Það er mikilvægt að nýta þá miklu sérþekkingu sem til staðar er í ráðuneytinu og stytta boðleiðir sem ég tel að nýtt skipurit muni gera. Ætlunin er að sigla umbótum hratt og vel í höfn, barnanna vegna,“ segir Inga Sæland, nýr mennta- og barnamálaráðherra.
Með nýju skipulagi er megináhersla lögð á fagskrifstofur sem bera heildstæða ábyrgð á stefnumótun, greiningu, lagavinnu, innleiðingu, mati og eftirfylgni innan síns málaflokks. Þær eru þrjár talsins með tveimur stoðskrifstofum þeim til stuðnings:
Nýtt skipurit mennta- og barnamálaráðuneytisins
Skrifstofa ráðuneytisstjóra er lögð niður, með það að markmiði að draga úr yfirbyggingu um leið og fagleg og framkvæmdaleg ábyrgð er færð nær málaflokkunum sjálfum. Um leið er ætlunin að styrkja hlutverk ráðuneytisstjóra sem yfirstjórnanda, samhæfingar- og ábyrgðaraðila. Jafnframt verði sérstök teymi, fimm talsins, teymisstjórar og teymisstjórnir lögð niður.
Þótt horfið sé frá þverfaglegu skipuriti er ekki vikið frá markmiðum um samstarf og samþættingu sem er afar mikilvægt þegar kemur að menntamálum og farsæld barna. Samhliða nýju skipulagi verður innleitt vinnufyrirkomulag sem byggir á sprettum. Þar vinnur starfsfólk úr ólíkum fagskrifstofum saman að afmörkuðum verkefnum, áhersla er lögð á lausnamiðaða nálgun, hraða endurgjöf og skýr markmið. Þverfagleg samvinna verður því verkefnamiðuð en ekki grundvallarform skipuritsins.
Breytingarnar leiða óhjákvæmilega til þess að ákveðin störf leggjast niður og hefur sex starfsmönnum verið sagt upp. Um leið er mætt þeirri hagræðingarkröfu sem gerð er á árinu 2026 til rekstrar ráðuneytisins.
Breytingarnar taka þegar gildi og eftirfarandi aðilar hafa verið fluttir í embætti skrifstofustjóra á nýjum skrifstofum:
- Skrifstofustjóri fjármála og innri þjónustu er Ásgeir Runólfsson sem var áður skrifstofustjóri fjárlaga og rekstrar í félags- og húsnæðismálaráðuneytinu. Hafþór Einarsson sem var skrifstofustjóri fjármála og rekstrar í mennta- og barnamálaráðuneytinu verður skrifstofustjóri fjárlaga og rekstrar í félags- og húsnæðismálaráðuneytinu.
- Skrifstofustjóri stjórnsýslu er Anna Tryggvadóttir sem var skrifstofustjóri stjórnsýslu, mats og eftirlits.
- Skrifstofustjóri barnamála er Halldóra Dröfn Gunnarsdóttir sem áður var skrifstofustjóri stefnumótunar og innleiðingar.
- Auglýst verður eftir skrifstofustjóra skóla- og íþróttamála á næstu dögum. Björk Óttarsdóttir mun leiða starf skrifstofunnar þar til skrifstofustjóri hefur verið skipaður.
- Auglýst verður eftir skrifstofustjóra framhaldsskóla og framhaldsfræðslu á næstu dögum. Ragnhildur Bolladóttir mun leiða starf skrifstofunnar þar til skrifstofustjóri hefur verið skipaður.
