Veðurviðvörun hefur verið gefin út fyrir Tenerife þar sem lægðin ,,Therese“ nálgast og mikill stormur og snjór á að ganga yfir Kanaríeyjar
Yfirvöld á Tenerife hafa lýst yfir neyðarástandi um alla eyjuna þar sem stormurinn Therese gengur yfir eyjuna í þessari viku og hefur í för með sér hættu á mjög slæmu veðri, þar á meðal hvössum vindum yfir 100 km/klst sem jafngildir 28 m/s ásamt mikilli rigningu. Einnig er búist við snjókomu yfir 1.800 metra hæð í fjöllunum og hefur gönguleiðum og útivistarsvæðum í Teide-þjóðgarðinum verið lokað fyrir ferðamönnum.
Í morgun var stormur og ásamt öflugum vindhviðum sem hafa valdið því að nokkrar flugvélar hættu við lendingar á Gran Canaria, og neyddust flugmenn til að framkvæma svokallaðar „go-around“ öryggisaðgerðir.
Samkvæmt Canarian News sögðu flugumferðarstjórar að skyndilegar breytingar á vindstyrk og vindátt við lendingu séu taldar „hættulegar“. Þeir útskýrðu að „þegar flugvél er í lendingu, flýgur hún á tiltölulega hægum og stöðugum hraða.“ Þeir bættu svo við að „vindskekkja raski þessu jafnvægi á tvo vegu.“
Flugumferðarstjórar bentu einnig á að sterkir meðvindar tengdir storminum hafi ýtt sumum flugum sem voru að fara í loftið upp í óvenju mikinn hraða yfir jörðu, yfir 1.100 km/klst, en lögðu áherslu á að það stafi ekki nein hætta af því, heldur einfaldlega að flugvélarnar fljúgi innan mjög hraðfara loftstraums.
Viðvörunin leiddi til ýmissa lokana, takmarkana og þess að útivist var stöðvuð á eyjunni. Staðbundnir fjölmiðlar sögðu að íbúar og ferðamenn væru hvattir til að forðast óþarfa ferðalög og fylgjast með opinberum tilkynningum yfir daginn.
Frá kl. 15:00, 18. mars, gilda eftirfarandi takmarkanir:
- Lokun á TF-445 veginum sem liggur til Punta de Teno
- Bann við aðgangi að gönguleiðum, skógarstígum og útivistarsvæðum
- Lokun á Teide-þjóðgarðinum vegna snjókomu (frá 1.800 metra hæð)
- Öllum viðburðum utandyra frestað
Í umfjöllun um veðurspá fyrir eyjuna sagði staðbundni miðillinn Canarian Weekly: „Norðurhluti eyjarinnar, suðvesturhlutinn og hærra liggjandi svæði eru talin verða verst úti. Svæðið á milli Santiago del Teide og Arico hefur þar verið sérstaklega nefnt.“
