Tilkynning frá Auðbjörgu Reynisdóttur hjúkrunarfræðingi vegna öryggis sjúklinga:
Nú gefst tækifæri til þess að efla öryggi sjúklinga. Auðbjörg Reynisdóttir hjúkrunarfræðingur hefur opnað vefsíðu, www.audbjorg.com um málefnið í minningu sonar hennar Jóels sem lést vegna mistaka 24. febrúar 2001. Til stendur að gefa út rafbók á þessum tímamótum um sögu hans og er bókin í prófarkalestri.
Vefsíðunni er ætlað að verða fræðslusetur um öryggi sjúklinga og er sjónum beint sérstaklega að almenningi sem vill læra meira um það hvernig fólk eigi að tryggja sitt öryggi innan heilbrigðisþjónustunnar. Verkefnið er opið fyrir stuðningi á Karolina Fund (https://www.karolinafund.com/project/view/2394), til að fjármagna það næstu tvö árin. Þar má finna nánari upplýsingar um verkefnið.
Auðbjörg hefur aflað sér mikillar þekkingar víða um málefnið og fjallar um það frá ýmsum sjónarhornum. Fleiri fjölskyldumeðlimir hafa kært atvik til Embættis landlæknis og lýsir hún hvernig unnið var úr fjórum kærum til embættisins. Auk þess tekur hún önnur lærdómsrík dæmi um atvik og úrvinnslu þeirra á Íslandi, í Noregi og í Bandaríkjunum.
Það er hægt að læra bæði af góðum sögum og sögum sem enda illa. Á vefsíðunni verða bæði góðar og óþægilegar sögur. Vonandi einnig heilræði og miðlun þekkingar milli fagfólks og sjúklinga. Það er einmitt það sem skortir til að breyta öryggismenningunni. Að heyra og hlusta á það sem er erfitt og hefði kannski ekki átt að gerast gefur okkur tækifæri til að gera betur næst og færa framtíðinni dýrmæta þekkingu. Nú er tækifæri til að taka þátt í að móta öryggismenninguna okkur öllum til hagsbóta og að bæta heilbrigðiskerfið í sameiningu.
