„Við í Miðflokknum erum ekki í vandamálabransanum. Við erum í lausnabransanum,“

„Við í Miðflokknum erum ekki í vandamálabransanum. Við erum í lausnabransanum,“ sagði Sigmundur Davíð Gunnlaugsson, formaður Miðflokksins í stefnuræðu sinni á landsfundi flokksins

Sigmundur Davíð Gunnlaugsson formaður Miðflokksins flutti stefnuræðu sína á landsþingi flokksins í Norðurljósasal í Hörpu í dag. Á fyrsta landsþingi Miðflokksins sem að hefur staðið yfir um helgina, var Sigmundur Davíð kjörinn formaður með 100% atkvæða. Gunnar Bragi Sveinsson var kjörinn varaformaður flokksins með 64% greiddra atkvæða og Anna Kolbrún Árnadóttir var kjörin í embætti 2. varaformanns Miðflokksins

Sigmundur Davíð Gunnlaugsson, formaður Miðflokksins sagði í stefnuræði sinni á landsfundi í dag að breyta þyrfti stjórnmálunum þannig að þau færu að virka.
,,Ég nefndi það í gær að stefnuræðan mín yrði óhefðbundin og ég mun benda á það hvernig hægt er að nálgast verkefni í stjórnmálum.“ Sagði Sigmundur Davíð. Umhverfis og orkumál voru efst á baugi og sagði hann að þau mál, væru stóru málin í nútíma þjóðfélögum.
Sigmundur Davíð, ræddi m.a. um einnota umbúðir úr plasti og endurvinnslu og hvort að möguleikar væru til þess að endurvinna efni sem að falla til á Íslandi í stað þess að senda hráefnið út með flutningaskipum sem að brenna svartolíu og menga. Jafnframt ræddi hann mikla mengun plasts í höfum um allan heim sem og losun gróðurhúsalofttegunda.
,,Jafnvel þótt Íslendingar og fleiri næðu miklum árangri í að berjast gegn plastmengun væri óvíst að það skipti miklu. Það væri vegna þess að 88 til 90 prósent af öllu plasti í hafinu kæmu úr tíu fljótum, átta í Asíu og tveimur í Afríku.“ Sagði Sigmundur Davíð.

Kerfishugsanir duga ekki til þess að leysa stóru viðfangsefnin heldur verða menn að vera í lausnabransanum. Sigmundur sagðist í upphafi ræðu sinnar aðeins ætla að ræða eitt mál, en þó önnur út frá því. Þetta væru umhverfis- og orkumál og að þau væru dæmi um hvernig kerfishugsun mætti ekki verða til þess að fólk liti ekki á málin frá öllum hliðum og finndu nýjar lausnir.
Sigmundur Davíð benti t.d. á það að víða um heim er farið að nota þakplötur sem að framleiða rafmagn, í plötunum væru sólarsellur sem að framleiddu rafmagn fyrir heimilin. Hann fór yfir ýmis mál sem að koma að orkumálum og skýrði frá hver staða ýmissa þjóða væri í þeim efnum. ,,Rafmagnsbílar geta verið góður kostur víða á Íslandi og eru umhverfislega jákvæðir þar sem raforkan væri ekki framleidd hér á landi með kolaorku.“ Tæknivæðing og framfarir t.d. við það að breyta sorpi í orku, væru víða langt komnar t.d. í Óslo þar sem að plasti er breytt í orku með minni mengun en t.d. með framleiðslu á gasi.

Sigmundur Davíð benti á að efla þyrfti skógrækt og jarðvinnslu og að gríðarlega mikilvægt væri að styðja við íslenskan landbúnað. Það sé eitt það umhverfisvænasta sem Íslendingar geti gert. ,,Að kaupa íslenskar vörur og borða íslenskan mat og komast þannig hjá frekari losun gróðurhúsalofttegunda með því að flytja matvælin inn í landið. Íslenskur landbúnaður er umhverfisvæn atvinnugrein og í sátt við náttúruna en er ekki eins og landbúnaður er víða annars staðar, þar sem menn nota endalaust af sýklalyfjum og þurfa að vökva linnulaust og nota alls konar óæskileg efni og jafnvel áburð sem er bannaður á Íslandi og ýmislegt annað sem er bannað hér.

Hvers vegna að vera að flytja það inn og fljúga með það jafnvel í flutningavélum eða í þotum eða í besta falli að sigla með það í gámum til Íslands og losa allar þær gróðurhúsalofttegundir sem því fylgja? þegar að við höfum heilnæmustu og umhverfisvænustu framleiðsluna hér heima á Íslandi. Stuðningur við landbúnað er mikilvægt umhverfismál.“ Sagði Sigmundur Davíð.
„Við í Miðflokknum erum ekki í vandamálabransanum. Við erum í lausnabransanum,“ sagði Sigmundur Davíð Gunnlaugsson, formaður Miðflokksins að lokum í stefnuræðu sinni á Landsfundi flokksins í dag og uppskar mikið lófatak að lokinni ræðu sinni.