„Varla á að fara að ritskoða íslenska fjölmiðla?'' – Þjóðaröryggisráð

Sigmundur Davíð Gunnlaugsson, formaður Miðflokksins, furðar sig á stofnun vinnuhóps sem ætlað er að kortleggja birtingarmyndir og umfang upplýsingaóreiðu vegna COVID-19. Katrín Jakobsdóttir forsætisráðherra segir að það sé ábyrgðarhluti að kortleggja hvernig upplýsingum er komið á framfæri. Þetta kom fram á Rúv.
Í óundirbúinni fyrirspurn til forsætisráðherra velti hann því fyrir sér hver verkefni hennar eigi að vera. „Varla á að fara að ritskoða íslenska fjölmiðla? Er þá ætlunin sú að reyna að fylgjast með netinu og leiðrétta allt það bull sem kynni að finnast þar?“ Segir ennfremur.
Sigmundur Davíð segir þetta sérkennilegt í ljósi þess að almenningur sé vel upplýstur um farsóttina á daglegum upplýsingafundum almannavarna.

Katrín Jakobsdóttir svaraði að málið hefði verið rætt innan þjóðaröryggisráðsins hér og að stofnun hópsins sé ekki óeðlileg. Eðlilegt sé að bregðast við upplýsingaóreiðu hér eftir sem hingað til, eins og gert sé víðast hvar annars staðar. Hún tók undir að upplýsingamiðlun almannavarna hafi verið til fyrirmyndar.