Frá því farið var að bjóða upp á stafræn ökuskírteini á Íslandi vorið 2020 hafa 133 þúsund einstaklingar sótt sér slíkt í snjallsíma sína. Stafræna ökuskírteinið er því komið í mikla dreifingu hér á landi eða rúmlega helmingur ökumanna en um 260 þúsund einstaklingar eru með ökuréttindi hér á Ísland.
Það má því með sanni segja að Íslendingar hafa tekið þessari nýju þjónustu fagnandi og hafa landsmenn notað stafræna ökuskírteini sitt til að sýna fram á ökuréttindi og sem skilríki í kosningum.
Handhæg leið til að nálgast stafræna ökuskírteinið er að finna í Ísland.is appinu og á Ísland.is en þar er að finna leiðbeiningar um hvernig hægt er að hlaða skírteininu í veski snjallsíma. Þá eru allar upplýsingar um tegund ökuréttinda er að finna á Mínum síðum Ísland.is undir skírteini og þar má sömuleiðis nálgast stafræna ökuskírteinið.
Íslendingar hafa lítið verið á faraldsfæti síðan farið var að bjóða upp á stafræn ökuskírteini en mikilvægt er að athuga að það gildir ekki erlendis og því þarf að muna eftir plastinu þegar haldið er í ferðalag utan landssteinanna.
Um 4 þúsund skírteini eru ósótt hjá sýslumönnum. Flest ósótt skírteini er að finna hjá sýslumanninum á höfuðborgarsvæðinu eða um 3.200 og rúmlega 400 á Akureyri. Sýslumenn hvetja ökumenn eindregið til að nálgast skírteinin áður en haldið er í utanlandsferð.
