Verkföll boðuð í fjórum grunnskólum í janúar

Félagsfólk KÍ í Egilsstaðaskóla, Engjaskóla, Grundaskóla og Lindaskóla hefur samþykkt, með yfirgnæfandi meirihluta atkvæða, boðun verkfalls í janúar 2025.

Niðurstaða í atkvæðagreiðslu um boðun verkfalls í Egilsstaðaskóla á Egilsstöðum, Engjaskóla í Reykjavík, Grundaskóla á Akranesi og Lindaskóla í Kópavogi liggur fyrir. Kennarar og stjórnendur þessara skóla hafa samþykkt að boða verkfall 6. janúar 2025. Verkfallið er tímabundið og því lýkur 31. janúar 2025, hafi kjarasamningar ekki náðst.

Félagsmenn í Félagi grunnskólakennara (FG) og Skólastjórafélagi Íslands (SÍ), sem starfa í fyrrnefndum skólum, greiddu atkvæði um verkfallsboðunina. Atkvæðagreiðsla stóð dagana 19. nóvember – 21. nóvember 2024.

Kjörsókn var á bilinu 96 til 100 prósent. Já sögðu 98 til 100 prósent þeirra sem greiddu atkvæði.

Aðgerðir í sautján skólum

Félagsmenn Kennarasambandsins í sautján skólum hafa nú samþykkt verkföll, sum eru hafin en önnur eru boðuð í næstu viku og í byrjun janúar.

Leikskólinn

Verkföll hófust í fjórum leikskólum 29. október síðastliðinn. Þetta eru Leikskóli Seltjarnarness, Holt í Reykjanesbæ, Drafnarsteinn í Reykjavík og Ársalir á Sauðárkróki.
Verkföll þessi eru ótímabundin.

Grunnskólinn

Verkföll hófust í þremur grunnskólum 29. október síðastliðinn. Þetta eru Áslandsskóli í Hafnarfirði, Laugalækjarskóli í Reykjavík og Lundarskóli á Akureyri.
Verkföllin eru tímabundin og lýkur á morgun, föstudaginn 22. nóvember.
Næstu verkföll í grunnskólum hefjast á mánudag, 25. nóvember. Þá fer félagsfólk KÍ í Garðaskóla í Garðabæ, Árbæjarskóla í Reykjavík, og Heiðarskóla í Reykjanesbæ í verkfall.
Verkföllin eru tímabundin, standa til 20. desember, hafi samningar ekki náðst.
Þá hafa nú verið boðuð verkföll í fjórum grunnskólum frá og með 6. janúar 2025. Hér eru undir Egilsstaðaskóli á Egilsstöðum, Grundaskóli á Akranesi, Engjaskóli í Reykjavík og Lindaskóli í Kópavogi.
Verkföllin eru tímabundin og munu standa til 31. janúar 2025, hafi samningar ekki náðst.

Framhaldsskólinn

Félagsfólk KÍ í Fjölbrautaskóla Suðurlands hefur verið í verkfalli síðan 29. október síðastliðinn.
Félagsfólk KÍ í Menntaskólanum í Reykjavík hefur verið í verkfalli síðan 18. nóvember síðastliðinn.
Verkföllin eru tímabundin og standa til 20. desember næstkomandi, hafi samningar ekki náðst.

Tónlistarskólinn

Félagsfólk KÍ í Tónlistarskóla Ísafjarðar hefur verið í verkfalli síðan 29. október síðastliðinn.
Verkfallið er tímabundið og stendur til 20. desember, hafi samningar ekki náðst.

Hér er hægt að kynna sér stöðuna í kjaramálum og fyrirhugaðar aðgerðir betur.

Skora á samninganefndir að standa við gefin loforð

Um þrjú hundruð kennarar sóttu baráttufund í Hofi á Akureyri í gær. Fundurinn samþykkti ályktun þar sem segir meðal annars aðgerðaleysi samninganefnda hins opinbera sé í meira í lagi undarlegt.

„Ómálefnalegur launamunur milli opinbera og almenna markaðarins hefur haft alvarlegar afleiðingar í för með sér og leitt til skorts á menntuðum kennurum á öllum skólastigum. Við þeirri stöðu þarf að bregðast með því að jafna laun milli markaða og fjárfesta þannig í kennurum til hagsbóta fyrir komandi kynslóðir.“

Þetta er meðal þess sem kemur fram í ályktun samþykkt einróma á fjölmennum baráttufund í Hofi á Akureyri í gær. Fundurinn skorar jafnframt á samninganefndir sveitarfélaga og ríkis að standa við gefin loforð og tryggja að launa félagsmanna Kennarasambandsins standist samanburð við laun sérfræðinga á almennum markaði.

Fundurinn var sem fyrr segir vel sóttur og stemning rafmögnuð og baráttugleði. Ávörp fluttu Jónína Hauksdóttir, varaformaður KÍ, Jón Ágúst Eyjólfsson, kennari í Síðuseli, Dagmar Ólína Gunnlaugsdóttir, kennari í Brekkuskóla, og Einar Brynjólfsson, kennari í VMA. Fundarstjóri var Bryndís Inda Stefánsdóttir.

Ályktun fundarins í heild

Ályktun frá baráttufundi kennara á Norðurlandi í Hofi 21. nóvember 2024

Félagsmenn KÍ á Norðurlandi leggja áherslu á að staðið sé við gerða samninga. Haustið 2016 var undirritað samkomulag um jöfnun lífeyrisréttinda og launa milli almenna og opinbera markaðarins. Strax ári síðar höfðu lífeyrisréttindi launþega á almennum og opinberum vinnumarkaði verið jöfnuð með tilheyrandi skerðingum á lífeyri opinberra starfsmanna, þar með talið kennara. Í framhaldinu átti að fara af stað vinna um jöfnun launa milli markaða og átti hún að taka 6-10 ár. Ekkert bólar þó enn á þeirri vinnu, nú 8 árum síðar. Þrátt fyrir gefin loforð virðist hið opinbera, hvort sem er ríki eða sveitarfélög, engan áhuga hafa á að semja um launaleiðréttingu enda þótt laun kennara hafi dregist aftur úr öðrum sérfræðingum. Aðgerðarleysi samninganefnda hins opinbera verður að teljast í meira lagi undarlegt þegar rúmar þrjár vikur eru liðnar af verkfallsaðgerðum kennara.

Ómálefnalegur launamunur milli opinbera og almenna markaðarins hefur haft alvarlegar afleiðingar í för með sér og leitt til skorts á menntuðum kennurum á öllum skólastigum. Við þeirri stöðu þarf að bregðast með því að jafna laun milli markaða og fjárfesta þannig í kennurum til hagsbóta fyrir komandi kynslóðir. Baráttufundur félagsmanna Kennarasambands Íslands í Hofi, þann 21. nóvember 2024, skorar á samninganefndir hins opinbera, bæði ríkis og sveitarfélaga, að standa við gefin loforð og tryggja að laun félagsfólks KÍ standist samanburð við laun sérfræðinga á almennum markaði.

Fjárfestum í kennurum. Fjárfestum í framtíðinni.