Pétur Gunnlaugsson ræddi við Sigurjón Þórðarson, þingmann Flokks fólksins og formann atvinnuveganefndar Alþingis í Síðdegisútvarpinu. Þar kom fram að Sigurjón telur stjórnarandstöðuna meðvitað vinna gegn framgangi brýnna mála og sagði nauðsynlegt að stjórnarflokkarnir sýni meiri einhug og hörku gagnvart slíkri mótstöðu. Hlusta má á þáttinn í spilaranum hér að neðan.
Mikilvæg mál felld út vegna pólitísks þrýstings
Sigurjón sagði að í þinglokasamkomulaginu hafi verið horfið frá ýmsum tillögum sem snúa að útlendingamálum og samfélagslegri ábyrgð, einfaldlega vegna þrýstings frá stjórnarandstöðunni. Hann taldi það alvarlegt að mál sem snerta öryggi og lagaumgjörð séu látin víkja í þágu pólitískra leikflétta. Það væri að mati Sigurjóns ekki hægt að leyfa minnihlutanum að komast upp með slíka pólitíska leiki.
Stjórnarandstaðan með kerfisbundna andstöðu
Í viðtalinu lýsti Sigurjón því hvernig stjórnarandstaðan beitti skipulögðu málþófi og tafartaktík til að hindra framgang mála. Hann sagði slíkar aðferðir grafa undan trausti almennings á Alþingi og kallaði eftir því að stjórnarflokkarnir tækju harðari afstöðu gagnvart slíkri hegðun og koma þyrfti fram af meiri hörku gagnvart stjórnarandstöðunni og bætti við að ekki megi endalaust reyna að ná sátt þegar hinn aðilinn sækist eftir því að stöðva framgang mála.
Ríkisstjórnin þarf að standa betur saman
Sigurjón lagði áherslu á að stjórnarflokkarnir þurfi að standa þétt saman og forgangsraða þeim málum sem kjósendur hafi kosið þá til að vinna að. Hann gagnrýndi að sum mál hafi farið forgörðum vegna skorts á samstöðu og of mikillar eftirgjafar gagnvart stjórnarandstöðunni. Hann sagði að verði slík þróun látin viðgangast, þá muni raunveruleg mál sem skipta almenning máli sitja á hakanum.
Hlusta má á ítarlegri umfjöllun í spilaranum hér að neðan
