Ákærður fyrir kynferðisbrot gegn 4 fötluðum konum

 
55 ára gamall karlmaður sem hefur verið úrskurðaður í nálgunarbann gagnvart konu og barnungri dóttur hennar, hefur verið ákærður fyrir kynferðisbrot gegn fjórum fötluðum konum. Konurnar krefjast þess að maðurinn verði dæmdur til að greiða sér samtals tíu milljónir í miskabætur. 
Ákæran gegn manninum var þingfest í Héraðsdómi Reykjavíkur og samkvæmt upplýsingum fréttastofu Rúv, sætti maðurinn aldrei gæsluvarðhaldi en rannsókn málsins var bæði flókin og umfangsmikil. Var málið m.a sent tvívegis til lögreglunnar á Höfuðborgarsvæðinu til framhaldsrannsóknar.
Landsréttur staðfesti í vikunni nálgunarbann yfir manninum gagnvart fimmtu konunni og barnungri dóttur hennar. Þar kemur fram að maðurinn sé undir rökstuddum grun um kynferðis- og ofbeldisbrot, hótanir, áreitni og ónæði.
Sum brotanna eru um fimm ára gömul og er manninum meðal annars gefið að sök að hafa brotið fjórum sinnum gegn einni konunni frá því í lok árs 2014 til byrjun árs 2015, þar af tvívegis á gólfi salernis við Holtagarða. Þá hafi hann haft tólf þúsund krónur af einni konunni og laug því að annarri að hann vildi trúlofast henni. Héraðssaksóknari segir í ákærunni að maðurinn hafi beitt konuna ólögmætri nauðung og nýtt sér yfirburði sína og aðstöðumun. Þá hafi honum verið kunnugt um fötlun konunnar vegna tengsla sinna við hana.
Maðurinn er ákærður fyrir kynferðisbrot, blygðunarsemisbrot og hótanir gagnvart annarri konu sem samkvæmt ákæru saksóknara er þroskahömluð. Hann er sagður hafa beitt hana blekkingum um það hver hann væri og síðan hvers eðlis samband þeirra væri í gegnum samskiptaforritið Messenger í þeim tilgangi að eiga í kynferðislegum samskiptum við hana. Þá fékk hann konuna til að senda sér kynferðislegar myndir og hótaði síðan að birta þær. Í ákærunni kemur meðal annars fram að maðurinn hafi talið konunni trú um að hann vildi trúlofast henni og nýtt sér yfirburði sína og aðstöðumun til að brjóta gegn henni kynferðislega.
Maðurinn er sagður hafa brotið kynferðislega gegn tveimur þroskahömluðum konum í bíl í Norðlingaholti og segir Saksóknari að konurnar hafi ekki skilið þýðingu verknaðarins vegna fötlunar sinnar og að manninum hafi verið kunnugt um hana vegna tengsla sinna við þær. Hann er síðan sagður hafa brotið ítrekað gegn annarri þeirra á heimili sínu. Honum er jafnframt gefið að sök hafa beitt hana blekkingum, meðal annars hafi hann lofað henni peningagreiðslum og hótað að drepa sig í þeim tilgangi að fá hana til að senda sér nektarmyndir. Konurnar fjórar krefja manninn um samtals 10 milljónir króna í miskabætur.