FRÁ FARSÓTTANEFND OG VIÐBRAGÐSSTJÓRN
Landspítali er á hættustigi, sem er annað af þremur viðbragðsstigum Landspítala. Ástæðan er faraldur COVID-19. Skilgreining hættustigs samkvæmt viðbragðsáætlun Landspítala er eftirfarandi: Orðinn atburður sem kallar á að starfað sé eftir viðbragðsáætlunum. Fjöldi þolenda af þeirri stærðargráðu að aukið álag skapast á ýmsar deildir (gulur litur í gátlistum). Viðbragðsáætlun Landspítala vegna farsótta hefur því verið virkjuð og funda viðbragðsstjórn og farsóttanefnd daglega.
Staðan kl. 12 í gær: 24 sjúklingar liggja á Landspítala vegna COVID. 17 sjúklingar liggja á bráðalegudeildum spítalans og eru 7 þeirra óbólusettir. Á gjörgæslu eru 7 sjúklingar og eru þrír þeirra óbólusettir. Fimm gjörgæslusjúklingar þurfa öndunarvélastuðning og eru tveir þeirra óbólusettir. Engir sjúklingar í innlögn eru hálfbólusettir. Meðalaldur innlagðra er 62 ár.
Alls hafa 85 sjúklingar lagst inn á Landspítala með COVID í fjórðu bylgju faraldursins. Um þriðjungur er óbólusettur. Fjórtán hafa þurft gjörgæslustuðning.
Nú eru 1.020 þar af 244 börn í COVID göngudeild spítalans og fækkar talsvert. Engir sjúklingar eru metnir rauðir en 24 einstaklingar gulir og þurfa nánara eftirlit.
15 starfsmenn eru í einangrun með COVID-19, 11 í sóttkví A og 87 í sóttkví C.
Starfsmenn eru hvattir til að vakta líðan sína daglega og fara í sýnatöku ef einkenna verður vart. Fari heimilismaður starfsmanns í sýnatöku þá skal starfsmaður vera heima í úrvinnslusóttkví þar til svar liggur fyrir.
Talnaupplýsingar um stöðuna á spítalanum eru birtar á Landspitali.is :
