Guðlaugur Þór Þórðarson, umhverfis- orku- og loftslagsráðherra hefur kynnt fjögur verkefni sem fá úthlutað styrkjum til verkefna sem felast í hreinsun strandlengju Íslands.
Styrkirnir eru veittir á grundvelli aðgerðar 17 í aðgerðaráætlun umhverfis- og auðlindaráðuneytisins í plastmálefnum Úr viðjum plastsins. Aðgerðin felur í sér að sett er af stað átak til 3 – 5 ára til allsherjarhreinsunar strandlengjunnar af plasti og öðrum úrgangi.
Hreinleiki sjávar er Íslandi afar mikilvægur og strandhreinsanir gegna þar veigamiklu hlutverki.
Tilgangurinn með styrkveitingunum er sá að strandlengja Íslands verði hreinsuð með skipulegum hætti, hreinsuðum ströndum verði haldið við, efla vitundarvakningu hjá almenningi um mikilvægi strandhreinsana og virkja áhugasama aðila til þátttöku í átaki um hreinsun strandlengjunnar.
„Það þarf ekki að fara mörgum orðum um mikilvægi þess að draga úr plastmengun á ströndum og á hafi. Frjáls félagasamtök og sjálfboðaliðar hafa gegnt lykilhlutverki við þessa hreinsun. Við viljum styðja þau í þessu verki,“ segir Guðlaugur Þór Þórðarson umhverfis-, orku- og loftslagsráðherra.
Styrkirnir voru auglýstir þann 10. nóvember 2021 og bárust fjórar umsóknir um styrki. Heildarstyrkupphæð er 20 milljónir króna.
Eftirtalin verkefni hlutu styrk til verkefna sem felast í hreinsun á strandlengju Íslands:
| Umsækjandi | Styrkupphæð |
| Blái herinn | 7,500.000 kr. |
| Veraldarvinir | 7,500.000 kr. |
| Ocean Missions | 2,500.000 kr. |
| Seeds | 2,500.000 kr. |
