Krafa transfólks um að líffræðilegir karlmenn hafi aðgang að salernum og búningsklefum kvenna er hápólitískt mál. Núna hefur Mike Johnson, forseti fulltrúadeildar Bandaríkjaþings, fengið nóg og tilkynnir að transkonur og transkarlar verða að nota salerni þingsins út frá líffræðilega skilgreindu kyni. Fréttamiðillinn Þjóðólfur.is greindi frá.
The Hill greinir frá því, að núna sé að minnsta kosti einn staður í Bandaríkjunum þar sem hægt er að vera alveg viss um að einungis karlmenn noti klósett fyrir karla og einungis konur noti kvennaklósett. Mike Johnson, forseti fulltrúadeildar Bandaríkjaþings, sendi frá sér yfirlýsingu um málið.
Vaxandi vandamál
Transkonur sem eru líffræðilega séð karlmenn en greina sig sem konur hafa að undanförnu notað svæði ætluðum konum eins og til dæmis búningsklefa, sturtur og salerni. Líffræðilegir karlar hafa breytt sér í konur og tekið þátt í hefðbundnum kvennaíþróttum og „sigrað“ þökk sé sterkari líkamsbyggingu. Finnst mörgum að verið sé að ræna íþróttum af konum og friðhelgi þeirra í búningsklefum og salernum ætluðum sér.
Vandamál hafa einnig komið upp með sumar transkonur sem beitt hafi konur kynferðislegri áreitni og líkamsárásum á svæðum ætluðum konum. Þrúgandi pólitískur rétttrúnaður er ríkjandi hjá valdhöfum og hefur enginn þorað að taka af skarið þar til núna.
Takmarkaður aðgangur
Forseti Bandaríkjaþings tilkynnti í vikunni, að salerni í þinghúsinu Capitol yrðu ekki opin fyrir fólk af öðru líffræðilega kyni.
Mike Johnson sagði í yfirlýsingu:
„Öll einkynja rými í þinghúsinu og fulltrúadeildinni – svo sem salerni, búningsklefar og sturtusvæði – eru frátekin fyrir fólk af sama líffræðilegu kyni. Það er mikilvægt að hafa í huga að skrifstofa hvers þingmanns er með eigið einkasalerni og kynhlutlaus salerni eru í boði í þinghúsinu.“
