Á 49. Evrópuráðstefnu Interpol sem fram fór 17.-19. maí sl. í Lyon, var farið yfir öryggisógnir sem steðja að Evrópu s.s. hryðjuverk, mansal, kynferðisbrot gegn börnum, fjármunabrot, spillingu og viðbrögð Interpol við þeim.
Fulltrúar frá 51 ríki ásamt fullrtúum frá alþjóðastofnunum sátu ráðstefnuna. Þær mörgu áskoranir sem Evrópa stendur frammi fyrir má segja að efstar á baugi séu; loftlagsbreytingar, tilfærsla yfir í stafrænt umhverfi og umbreytingar í stjórnmálum. Fjallað var um stríðið í Úkraínu og öryggisógnir því samfara, sérstaklega gagnvart A-Evrópu. Kynnt var nýlegt samtarfsverkefni Interpol og Frontex . Verkefni sem gengur m.a. út að sporna sérstaklega gegn glæpum sem ná yfir landamæri. Einnig var fjallað um glæpastarfsemi sem tengist flóttamannastraumi frá Úkraínu og þá sérstaklega mansali.
Eftirtalin drög að tillögum voru samþykkt á ráðstefnunni og fara áfram til meðferðar hjá framkvæmdastjórn Interpol
- Styrkja viðbragð Interpol gegn fjármunabrotum og spillingu.
- Auka notkun gagnagrunns innan Evrópu um ólögleg vopn sem kallast I-Arms.
- Nýta betur möguleika Interpol til að koma í veg fyrir, uppgötva, rannsaka og stöðva netbrot.
- Stefnumiðuð áætlun fyrir Evrópu árin 2022-2025.
- Aðildarrríki Interpol taki þátt í að afla sönnunargagna í rannsóknum á glæpum gegn mannkyni, mannréttindabrotum og stríðsglæpum sem eiga sér stað í Evrópu eða á heimsvísu og miðli upplýsingum sín á milli um þessi afbrot.
Fulltrúar Íslands á ráðstefnunni voru Gylfi H. Gylfason, aðstoðaryfirlögregluþjónn alþjóðadeildar ríkislögreglustjóra og Einar Sigurjónsson, lögreglufulltrúi í alþjóðadeild. Þá sat Jón F. Bjartmarz, yfirlögregluþjónn hjá ríkislögreglustjóra, ráðstefnuna.
Jón er í höfuðstöðvum Interpol þessa dagana að kanna hvaða nýir samstarfsmöguleikar gætu hentað Íslandi varðandi frekari þátttöku í því sem Interpol hefur upp á að bjóða. Þar er tilgangurinn að skoða hvernig lögreglan getur nýtt þetta samstarf ennþá betur en nú en þörf er á sterkari alþjóðasamvinnu samhliða aukinni alþjóðavæðingu í brotastarfsemi sem teygir anga sína til Íslands með ýmsum hætti.
Ísland hefur tekið þátt í starfi Interpol frá 1971 og rekur alþjóðadeild landaskrifstofu Interpol á Íslandi. Interpol býr yfir öruggu samskipta- og upplýsingakerfi fyrir alþjóðlegt lögreglusamstarf og veitir aðildarríkjum sínum m.a. aðgang að gagnagrunnum og sérþekkingu á sviði lögreglu og alþjóðlegrar brotastarfsemi. Á síðustu rúmum fimmtíu árum hefur starfsemi lögreglunnar notið góðs af umfangi og þróun samstarfsins innan Interpol. Framtíð alþjóðasamstarfs lögreglunnar á vettvangi Interpol hvílir því á traustum grunni.
