Katrín Jakobsdóttir forsætisráðherra tók í gær þátt í rafrænni ráðstefnu á vegum OECD þar sem rætt var um endurreisn samfélaga eftir COVID. Ráðstefnan var haldin í tilefni árs afmælis WISE, sem er samstarf innan OECD sem snýr að velsæld, sjálfbærni og jafnrétti.
Forsætisráðherra var meðal þátttakenda í pallborðsumræðum ásamt Hönnu Sarkkinen, félags- og heilbrigðismálaráðherra Finnlands, og Didier Lenoir, fastafulltrúa ESB hjá OECD en aðstoðarframkvæmdastjóri OECD, Ulrik Vestergaard, var fundarstjóri.
Í umræðunum var rætt um það hvernig hægt verði að tryggja að horft verði til velsældarsjónarmiða við endurreisnina í kjölfar COVID. Forsætisráðherra lagði áherslu á hversu mikilvægt það hefði verið fyrir Ísland að hafa notað velsældarmælikvarða og sett niður velsældaráherslur fyrir heimsfaraldur. Hvort tveggja hefði reynst mikilvægt fyrir stefnumörkun í aðgerðum í faraldrinum.
Katrín Jakobsdóttir forsætisráðherra:
„Aðferðafræði velsældarhagkerfisins byggir á að meta stefnu og ákvarðanir út frá fjölbreyttum sjónarmiðum – hagrænum, samfélagslegum og umhverfislegum. Það tryggir betur velsæld fyrir okkur öll.“
Forsætisráðherra greindi einnig frá vinnu sem fram hefur farið hér á landi við þróun 39 velsældarmælikvarða, sem er ætlað að gefa heildarmynd af hagsæld og lífsgæðum landsmanna yfir tíma. Þá upplýsti ráðherra um þær sex velsældaráherslur sem lagðar hafa verið til grundvallar við gerð fjármálaáætlunar og fjárlaga og ætlað að vera leiðarstef vinnu á öllum málefnasviðum þar sem við á og mynda þannig ramma um forgangsröðun og framtíðarsýn ríkisstjórnarinnar.
Á ráðstefnunni var einnig kynnt ný skýrsla OECD um áhrif heimsfaraldursins á velsæld í aðildarríkjunum.
