Logi Einarsson menningarmálaráðherra hefur skipað Jónas Má Torfason formann nefndar um endurgreiðslu vegna kvikmyndagerðar á Íslandi. Jónas er sonur Ölmu Möller heilbrigðisráðherra.
Ríkisútvarpið birti fyrst frétt af málinu og þar segir: ,, Jónas Már Torfason hefur verið skipaður formaður nefndar um endurgreiðslur vegna kvikmyndagerðar á Íslandi. Hann er skipaður af Loga Einarssyni, menningar-, nýsköpunar- og háskólaráðherra. Jónas Már er sonur Ölmu Möller, heilbrigðisráðherra og samflokkskonu menningarmálaráðherra í Samfylkingunni.
Jónas Már er lögfræðingur og hefur verið virkur í starfi Samfylkingarinnar frá 2014. Hann er formaður Félags frjálslyndra jafnaðaramanna, og hefur setið í flokksstjórn og framkvæmdastjórn Samfylkingarinnar.
Samkvæmt lögum um tímabundnar endurgreiðslur vegna kvikmyndagerðar á Íslandi tilnefna ráðherra sem fer með kvikmyndir og ráðherra sem fer með fjárreiður ríkisins og fjármál sinn fulltrúa hvor, en sá þriðji skal skipaður án tilnefningar og vera formaður nefndarinnar.
Jónas Már staðfestir í samtali við fréttastofu að hann hafi fengið skipunarbréf á mánudag. Fyrsti fundur nefndarinnar undir hans stjórn var í dag.
Endurgreiðslur til sjónvarps- og kvikmyndaverkefna hafa aukist jafnt og þétt síðustu ár. Þær voru rúmur milljarður fyrir áratug síðan en í ár er áætlað að endurgreiðsla nemi sex milljörðum króna.
