Sigurður Þ. Ragnarsson og Gísli Sveinbergsson skrifa
Enn dregur í sundur milli Hafnarfjarðar og annarra sveitarfélaga á höfuðborgarsvæðinu, þegar kemur að fjölda íbúða í byggingu
Í lok mars sl. voru 104 íbúðir alls í byggingu í Hafnarfirði og er það lang minnsti fjöldi allra sveitarfélaga á höfuðborgarsvæðinu utan Seltjarnarness. Næst kom Mosfellsbær með 510 íbúðir eða fimmfalt fleiri. Í Garðabæ 637, í Kópavogi 1.081 eða tífalt fleiri og í Reykjavík 2.642 eða 25 falt fleiri en í Hafnarfirði.
Fjöldi íbúða í byggingu hefur stöðugt verið að dragast saman síðustu ár og nú er svo komið að vöntun á framboði nýrra íbúða er farin að hafa neikvæð áhrif á fólksfjölgun í bæjarfélaginu. Fólksfjölgun í bænum er áberandi minni en í sveitarfélögunum kringum okkur og er það mikið áhyggjuefni.
Núverandi meirihluti Sjálfstæðisflokks og Framsóknarflokks hefur viljað skella skuldinni á rafmagnslínurnar sem liggja yfir nýju hverfi sem kallast Hamranes. Það skýrir ekki nema hluta vandans. Skarðshlíðin (núverandi byggingasvæði) er ekki við þessar línur nema að litlu leyti. Skarðshlíð 1 er að fullu úthlutað en í Skarðshlíð 2 og 3 eru um 95 lausar lóðir og salan dræm. Í Skarðshlíð 3 er t.a.m. búið að selja 6 lóðir af 50.
Á fundi með stjórn Meistarafélags iðnaðarmanna í bænum kom fram að íþyngjandi byggingaskilmálar og verð lóða spili hér stórt hlutverk sem hleypir upp byggingakostnaði, dregur úr samkeppnihæfni og sé hindrun í eðlilegri uppbyggingu. Nokkuð hefur verið dregið úr þessum íþyngjandi skipulagsskilmálum en ganga þarf lengra að mati þeirra.
Þessu verður að snúa við og það hlýtur að vera hlutverk kjörinna fulltrúa að vinna saman að því að móta þann jarðveg sem þarf til að húsnæðisuppbygging geti verið blómleg og í takti við það sem gerist í kringum okkur.
Sigurður Þ. Ragnarsson, bæjarfulltrúi Miðflokksins
Gísli Sveinbergsson, situr í skipulags- og byggingaráði.
Birtist fyrst í Fjarðarfréttum
