,,Leitt að þessi frábæra tillaga skyldi ekki vinna í listaverkasamkeppninni um gafl þessa húss.“ Segir á vef Stjórnarskrárfélagsins sem að harmar að tillaga þeirra um að auðlindarákvæði nýrrar stjórnarskrár fengi ekki að prýða vegg Sjávarútvegshússins við Skúlagötu, en samkeppni var um tillögu að verki sem að skal prýða vegginn.
,,Þá gætu landsmenn sem ættu leið þar hjá rifjað upp hvernig auðlindaákvæðið er í nýju stjórnarskránni og jafnvel skemmt sér við að hugleiða hvort sú ömurlega staða sem nú er á Alþingi í tengslum við Orkupakka 3, væri raunin ef Alþingi hefði bara auðnast að virða niðurstöður þjóðaratkvæðagreiðslunnar 2012 með því að leggja nýju stjórnarskrána til grundvallar sem stjórnarskrá Íslands.
Hér er auðlindaákvæðið, en munum að í núgildandi stjórnarskrá eru auðlindir landsins ekki nefndar einu orði:
Auðlindir í náttúru Íslands, sem ekki eru í einkaeigu, eru sameiginleg og ævarandi eign þjóðarinnar. Enginn getur fengið auðlindirnar, eða réttindi tengd þeim, til eignar eða varanlegra afnota og aldrei má selja þær eða veðsetja.
Til auðlinda í þjóðareign teljast náttúrugæði, svo sem nytjastofnar, aðrar auðlindir hafs og hafsbotns innan íslenskrar lögsögu og uppsprettur vatns- og virkjunarréttinda, jarðhita- og námaréttinda. Með lögum má kveða á um þjóðareign á auðlindum undir tiltekinni dýpt frá yfirborði jarðar.
Við nýtingu auðlindanna skal hafa sjálfbæra þróun og almannahag að leiðarljósi.
Stjórnvöld bera, ásamt þeim sem nýta auðlindirnar, ábyrgð á vernd þeirra. Stjórnvöld geta á grundvelli laga veitt leyfi til afnota eða hagnýtingar auðlinda eða annarra takmarkaðra almannagæða, gegn fullu gjaldi og til tiltekins hóflegs tíma í senn. Slík leyfi skal veita á jafnræðisgrundvelli og þau leiða aldrei til eignarréttar eða óafturkallanlegs forræðis yfir auðlindunum.“
