Eng­inn veg­ur á Íslandi gerður fyr­ir 110 km/​klst

Eng­in áform eru af hálfu Vega­gerðar­inn­ar um að leggja til hækk­un há­marks­hraða um­fram 90 km/​klst. næstu árin, en Andrés Ingi Jónsson, þingmaður, spurði Sigurð Inga Jóhannsson, samgönguráðherra, á Alþingi hvar það hefði komið til álita að hækka hraðann. Í nýj­um um­ferðarlög­um seg­ir að heim­ilt sé að hækka hraðann um­fram 90 km/​klst. með upp­setn­ingu skilta.
Enginn vegur á Íslandi uppfyllir skilyrði laga fyrir því að hækka leyfilegan hámarkshraða í 110 kílómetra á klukkustund. Vegagerðin hefur engin áform um að leggja til slíka hækkun. Lögum samkvæmt er hámarkshraði á vegum úti 90 kílómetrar á klukkustund. Þó er heimild til að leyfa allt að 110 kílómetra hraða ef akstursstefnur eru aðgreindar og önnur skilyrði uppfyllt.
Andrés Ingi Jónsson, þingmaður utan þingflokka, spurði Sigurð Inga Jóhannsson samgönguráðherra á hvaða vegarköflum hefði komið til álita að hækka hámarkshraðann. Í svari ráðherra segir að það hafi aldrei komið til tals því enginn íslenskur vegur uppfyllir skilyrði fyrir því að hækka hraðann. Fjallað var um málið á vef fíb.
Reykjanesbraut milli Hafnarfjarðar og Keflavíkur uppfyllir nokkur skilyrðanna fyrir 110 kílómetra hámarkshraða en ekki öll. Þannig er öryggissvæði við veginn ekki nógu breitt, og ljósastaurar norðan brautarinnar gætu valdið slysi ef ekið er á þá. Auk þess er ekki búið að ganga frá svæðinu milli gagnstæðra akreina þannig að bílar geti ekki farið yfir á vitlausan vegarhelming. Loks er ekki hægt að banna hjólreiðar á Reykjanesbrautinni þar sem hjólreiðafólki hefur ekki verið tryggð örugg leið milli Hafnarfjarðar og Keflavíkur.
„Til að heim­ila 110 km/​klst. yrði að tryggja að lág­marki 18 m breitt svæði án hindr­ana beggja vegna braut­ar­inn­ar til að draga úr hættu á al­var­leg­um meiðslum við útafa­kst­ur. Sem dæmi má nefna að norðan braut­ar­inn­ar eru ljósastaur­ar sem gætu valdið slysi yrði ekið á þá. Unnið er að því að skipta þess­um staur­um út fyr­ir ör­ugg­ari staura en þeirri vinnu er ekki lokið.
Miðju­svæðið milli ak­brauta, svo­kallaður miðdeil­ir, upp­fyll­ir ekki held­ur skil­yrðin. Á miðju­svæðinu hef­ur verið unnið að upp­setn­ingu vegriðs til að koma í veg fyr­ir að öku­tæki geti farið yfir á ak­braut með gagn­stæða akst­urs­stefnu. Segja má að sú vinna sé aðeins hálfnuð þar sem vegrið hef­ur ein­ung­is verið sett upp meðfram öðrum veg­kanti, að jafnaði þeim meg­in sem veg­kant­ur ligg­ur hærra í landi. Ekki ligg­ur fyr­ir hvenær unnt verður að ljúka upp­setn­ingu vegriðs í miðdeili,“ seg­ir í svari ráðherra, sem einnig minn­ist á að hjól­reiðafólki hafi ekki verið tryggð ör­ugg leið á milli Hafn­ar­fjarðar og Kefla­vík­ur og því sé ekki hægt að banna hjól­reiðar á Reykja­nes­braut­inni.
Svar samgöngu- og sveitarstjórnarráðherra við fyrirspurn frá Andrési Inga Jónssyni um hærri hámarkshraða má nálgast hér.